დღეს, აგვისტოს საკოორდინაციო საბჭომ ახალი რეგულაციები დაამატა და არსებულები გაახანგრძლივა. საბჭოს გადაწყვეტილებით:

• საქართველოში საზოგადოებრივი ტრანსპორტი 4 სექტემბერს არ აღდგება და შეზღუდვა 13 სექტემბრამდე გახანგრძლივდება;
• სასწავლო პროცესი სკოლებში 15 სექტემბრიდან 4 ოქტომბრამდე დისტანციურ რეჟიმში განახლდება. ანალოგიური რეგულაცია გავრცელდება უმაღლეს და პროფესიულ სასწავლებლებზე;
• 4 ოქტომბრამდე შეზღუდული დარჩება სააღმზრდელო დაწესებულებების მუშობა და ეს ეხება, როგორც სახელმწიფო, ასევე, კერძო ბაღებს.

განათლების მინისტრის, მიხეილ ჩხენკელის განცხადებით, 4 ოქტომბერს სწავლების დისტანციური რეჟიმი შეწყდება და სწავლა სკოლებში განახლდება იმის მიხედვით, კონკრეტულ სოფელსა და ქალაქში, როგორი ეპიდვითარებაა.

"ჩვენ გადავწყვიტეთ, რომ გვექნება დიფერენცირებული მიდგომა, რაც გულისხმობს შემდეგს — იმ ქალაქში, ან სოფელში, სადაც ინფიცირების მაჩვენებელი იქნება 4%-ზე ქვემოთ იქ სწავლა განახლდება საკლასო ოთახებში და აუდიტორიებში, ანუ დასწრებულ ფორმატში. ხოლო იქ, სადაც მაღალი იქნება მაჩვენებელი, დისტანციურად", — განაცხადა მან.

მისივე თქმით, თუ რომელიმე მშობელს ექნება სურვილი, რომ 4 ოქტომბრის შემდეგაც, ბავშვებმა გააგრძელონ სწავლა კვლავ დისტანციურ რეჟმში, ამის შესაძლებლობა ექნებათ.

რაც შეეხება უნივერსიტეტებს, მინისტრი განმარტავს, რომ ყველას თავისი დაწყების თარიღი გააჩნია, მაგრამ 4 ოქტომბრამდე ყველა იქნება დისტანციურ ფორმატში. ხოლო ამის შემდეგ, აუდიტორიებში აღდგენის გადაწყვეტილებას ინფიცირების მაჩვენებლის მიხედვით მიიღებენ.

მინისტრის თქმით, გამონაკლისი დაიშვება სამედიცინო პროგრამების სტუდენტებზე და ისინი შეძლებენ, დაესწრონ პრაქტიკულ, ლაბორატორიულ და კლინიკურ მეცადინეობებს, თუ სტუდენტებიც და ლექტორებიც ორჯერადად იქნებიან აცრილები.

"უნდა აღვნიშნო, რომ თეორიული მედიცინისთვისაც მთლიანად იქნება დისტანციურად 4 ოქტომბრამდე. მანამდე კი უფლებამოსილება ეძლევათ უნივერსიტეტებს, რომ მედიცინის პროგრამის სტუდენტებისთვის კლინიკური, ლაბორატორიული და პრაქტიკული ლექციები აწარმოონ დასწრებული ფორმატით, ოღონდ აქაც არის ძალიან მნიშვნელოვანი დათქმა, რომ ამ აქტივობების დროს, როგორც სტუდენტები, ასევე, პროფესორ-მასწავლებლები უნდა იყვნენ ორჯერ აცრილები", — განაცხადა მან.

საბჭო მოქალაქეებს კიდევ ერთხელ მოუწოდებს, კვლავ აქტიურად გამოიყენონ პირბადე, როგორც ღია, ისევე დახურულ სივრცეში, დაიცვან სოციალური დისტანცია და აქტიურად ჩაერთონ ვაქცინაციის პროცესში.