ჯანდაცვის მინისტრის მოადგილის, თამარ გაბუნიას განცხადებით არჩევნების ჩატარება მაღალ რისკებს არ უკავშირდება, მაგრამ აუცილებელია იმ რეკომენდაციების დაცვა, რაც სპეციალურად ამ დღისთვის არის შემუშავებული. ჟურნალისტის კითხვაზე, შეიცვალა თუ არა საპარლამენტო არჩევნების შემდეგ ეპიდომოლოგიური ვითარება, მან განაცხადა, რომ შარშან გავრცელება უფრო მეტად უკონტროლო აქციებმა გამოიწვია, ვიდრე არჩევნებმა.

"წინა არჩევნების შემდეგ იყო ძალიან მაღალი მობილობა, რაც უკავშირდებოდა ქუჩის აქციებს და ეს იყო მთავარი ბუსტერი იმ შემთხვევაში, ეპიდემიის გავრცელებისა. ეპიდემიის შემთხვევაში ის მობილობა, რომლის კონტროლი შესაძლებელია და რა გარემოშიც წესის დაცვა ხერხდება, ნაკლებად საშიშია. თუმცა უკონტროლო აქციების პირობებში მაღალია, ბუნებრივია, გვესმის ყველას ინფექციის გავრცელების რისკი. ეს იყო ძირითადი ბუსტერი და მკვებავი ეპიდემიის გავრცელების ნოემბერ-დეკემბრის პერიოდში და ახლა ეს არაერთხელ აღინიშნა.

თუ წესი იქნება დაცული, რისკი, რა თქმა უნდა, ყოველთვის არის, პოლიტიკური პროცესები არის გარკვეულწილად რთული და რისკი ყოველთვის არის, რაც, რა თქმა უნდა, ეპიდემიურად არის ძალიან სარისკო. ჩვენ ამ შემთხვევაში ვსაუბრობთ იმ ჩვეულ და რეგულირებულ გარემოში არჩევნების ჩატარებაზე, რაც შესაძლებელია, რომ გაკონტროლდეს და თავისთავად მაღალ რისკებს არ უკავშირდება, რადგან ამ რისკების გადაზღევა დღეს უკვე შესაძლებელია", — განაცხადა გაბუნიამ.

სახალხო დამცველმა, ნინო ლომჯარიამ განაცხადა, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.

ქართული ოცნება არჩევნების გადადებაზე უარს ამბობს. პარტიის ერთ-ერთმა ლიდერმა, მამუკა მდინარაძემ განაცხადა, რომ ოპოზიციას არჩევნებში მონაწილეობა მაინც მოუწევს.

გაიგეთ მეტი: