სახალხო დამცველი, ნინო ლომჯარია ამბობს, რომ არჩევნების გადადების საკითხზე 2020 წელს დაავადებათა კონტროლის ცენტრის ხელმძღვანელობასთან ჰქონდა კომუნიკაცია, წელს კი იქიდან გამომდინარე, თუ რა ეპიდემიოლოგიური მდგომარეობა იყო საპარლამენტო არჩევნების შემდეგ, ჩათვალა თავი ვალდებულად ეს განცხადება გაეკეთებინა.

"შარშან ამ პერიოდისთვის ჩვენ გაცილებით სხვა მდგომარეობა გვქონდა, ანუ წინასაარჩევნო პერიოდში, თუმცა როდესაც დაიწყო ინფიცირებულთა რაოდენობის ზრდა, მე პირადად მქონდა კომუნიკაცია ამ საკითხთან დაკავშირებით, მათ შორის, დაავადებათა კონტროლის ცენტრის ხელმძღვანელობასთან და მაშინ ვფიქრობდი, რომ ეს იყო ამ ადამიანების კომპეტენცია არჩევნების შედეგად რამდენად დამძიმდებოდა ეპიდემიოლოგიური მდგომარეობა, რადგან ბუნებრივია, მე, როგორც სახალხო დამცველს, ამის გამოცდილება არ მქონდა, თუმცა წელს იქიდან გამომდინარე, რომ ვნახეთ რა შედეგი მივიღეთ შარშან არჩევნების შემდგომ, დაკვირვების შედეგადაც ადვილი შესამჩნევია, ასევე, ეს ადამიანებიც ადასტურებენ, რომ არჩევნები ზრდის ინფიცირებულთა და გარდაცვლილთა რაოდენობას, მე ჩავთვალე თავი ვალდებულად მოქალაქეების სიცოცხლის უფლების დასაცავად გამეკეთებინა ეს განცხადება",— ამბობს სახალხო დამცველი.

მისივე თქმით, მთავარი სიტყვა ამ საკითხზე ეპიდემიოლოგებს ეთქმით, მათ უნდა აიღონ პასუხისმგებლობა და გააკეთონ პროგნოზი იმაზე, თუ რა მდგომარეობა იქნება არჩევნების შემდეგ.

"თუმცა რა თქმა უნდა, მთავარი სიტყვა ეთქმით ეპიდემიოლოგებს, მათ უნდა გააკეთონ პროგნოზი, მათ უნდა აიღონ ამ საკითხზე პასუხისმგებლობა და რა მდგომარეობა, პროგნოზი გვექნება ჩვენ არჩევნების შემდგომ და პოლიტიკოსებმა ამ პროგნოზის საფუძველზე მიიღონ გონივრული გადაწყვეტილება", — თქვა მან.

სახალხო დამცველმა, ნინო ლომჯარიამ განაცხადა, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.

ქართული ოცნება არჩევნების გადადებაზე უარს ამბობს. პარტიის ერთ-ერთმა ლიდერმა, მამუკა მდინარაძემ განაცხადა, რომ ოპოზიციას არჩევნებში მონაწილეობა მაინც მოუწევს.

გაიგეთ მეტი: