მმართველი პარტიის საზოგადოებასთან ურთიერთობის მდივანი, შალვა პაპუაშვილი, აცხადებს, რომ არჩევნები არ გადაიდება, ჩატარდება კოვიდუსაფრთხოდ, თავად ამ არჩევნებში "დამაჯერებლად გაიმარჯვებენ", ენმ-ს კი გადადების კამპანია იმიტომ აქვს, რომ იციან, დამარცხდებიან. თუმცა, კოვიდვითარებიდან გამომდინარე არჩევნების გადადების საკითხზე მსჯელობის აუცილებლობაზე და არა გადადებაზე განცხადება სახალხო დამცველმა გააკეთა.

"სინამდვილეში ამ ყველაფერს აქვს ერთადერთი მიზეზი — მათ ზუსტად იციან, რომ დამარცხდებიან. არჩევნები ჩატარდება, ჩატარდება კოვიდუსაფრთხოდ და ჩვენ ამ არჩევნებში დამაჯერებლად გავიმარჯვებთ", — აცხადებს პაპუაშვილი.

მისი თქმით, ერთმანეთისგან უნდა გავმიჯნოთ წინასაარჩევნო კამპანია და უშუალოდ არჩევნები. საქართველომ პანდემიის პირობებში არჩევნების მომზადების და უსაფრთხოდ ჩატარების მხრივ არაერთი საერთაშორისო სადამკვირვებლო მისიის დადებითი შეფასება დაიმსახურა. წინასაარჩევნო კამპანიაზე პასუხისმგებლობა კი არამხოლოდ ხელისუფლებაზე, არამედ თავად პარტიებზეცაა. ამასთან, აღნიშნავს, რომ ქართული ოცნება ამ საკითხს პასუხისმგებლობით ეკიდება და კამპანიას ნორმების დაცვით ატარებენ.

"აქვე საზოგადოებას შევახსენებ, რომ სულ რამდენიმე დღეში ჩვენ უკვე გვეყოლება, სულ მცირე, ერთი დოზით აცრილი მილიონი ადამიანი, ანუ ზრდასრული მოსახლეობის 35%. არჩევნების დღისთვის კი, არსებული ტემპებით ზრდასრული მოსახლეობის, დაახლოებით, 60% სულ მცირე ერთი დოზით იქნება აცრილი", — ნათქვამია პარტიის პრესამსახურის მიერ გავრცელებულ პაპუაშვილის განცხადებაში.

ამასთან, მისივე თქმით, ნაციონალურ მოძრაობასდაწყებული აქვს არჩევნების გადადების მოთხოვნის კამპანია, რადგან იციან, რომ დამარცხდებიან და საბაბად კი პანდემიას იშველიებენ.

"არჩევნებამდე ერთი თვით ადრე არჩევნების გადადების მოთხოვნა პირდაპირ ნიშნავს პოლიტიკურ კაპიტულაციას, რამდენიც არ უნდა ისპეკულირონ, თითქოსდა, მათ მოსახლეობის ჯანმრთელობა აინტერესებთ. ჩვენ პანდემიის თითქმის ორწლიან პერიოდში ვხედავდით ნაციონალური მოძრაობის უპასუხისმგებლო დამოკიდებულებას ეპიდსიტუაციის და მათ შორის რეგულაციების მიმართ. რატომღაც მათ მხოლოდ ახლა გაახსენდათ, რომ ჩვენი ქვეყანა პანდემიის პირობებში ცხოვრობს", — აცხადებს ის.

მისივე თქმით, ნაციონალური მოძრაობის კამპანია სამ ამოცანას ემსახურება: საჭიროების შემთხვევაში წინმსწრებად ჰქონდეთ მომზადებული საბაბი თვითმმართველობის არჩევნებისთვის ბოიკოტის გამოსაცხადებლად; არჩევნებში მონაწილეობის შემთხვევაში, გარდაუვალი მარცხის შემდეგ გამოაცხადონ, რომ ეს მარცხი მძიმე ეპიდვითარებამ გამოიწვია და წინასაარჩევნო პერიოდში აწარმოონ მადისკრედიტირებელი კამპანია ხელისუფლების მიმართ.