"პირველ რიგში, რაც რუსეთმა უნდა გააკეთოს, საქართველოს ტერიტორიიდან თავისი ძალები გაიყვანოს" — ასე ეხმიანება აშშ-ის ელჩი კელი დეგნანი რუსეთის საგარეო საქმეთა სამინისტროს განცხადებას. აგვისტოს ომის 13 წლისთავის წინ რუსეთი საქართველოსთან ურთიერთობის აღდგენის მზადყოფნაზე ალაპარაკდა.

დეგნანი კონფლიქტის მოგვარების პასუხისმგებლობას რუსეთს აკისრებს და ფიქრობს, რომ თუ მას ნამდვილად სურს საქართველოსთან ურთიერთობის აღდგენა, ქმედითი ნაბიჯები უნდა გადადგას.

"ვფიქრობ, ქართველებს რუსეთისგან მსგავსი გზავნილი ადრეც მოუსმენიათ. პირველ რიგში, რაც რუსეთმა უნდა გააკეთოს, საქართველოს ტერიტორიიდან თავისი ძალები გაიყვანოს. ეს იქნება იმის ნამდვილი ნიშანი, რომ რუსეთი სერიოზულად არის განწყობილი და უბრალოდ დეზინფორმაციას არ ეწევა.

ქართველებისთვის ძალიან მნიშვნელოვანია დაინახონ, რომ რუსეთს გაჰყავს თავისი ძალები ოკუპირებული ტერიტორიებიდან, აუქმებს ცხინვალისა და აფხაზეთის აღიარებას და დაუყოვნებლივ ხსნის წვდომას ჰუმანიტარული დერეფნებზე. ჟენევის საერთაშორისო დისკუსიები არის დიალოგის მექანიზმი და თუ რუსეთი გამოიყენებს ამ მექანიზმს უფრო ეფექტიანად და კეთილსინდისიერად, შესაძლოა, დავინახოთ მეტი პროგრესი ამ კონფლიქტების დარეგულირებაში", — განაცხადა მან.

გუშინ, 5 აგვისტოს რუსეთის საგარეო საქმეთა სამინისტრომ ტვიტერზე დაწერა, რომ საქართველოსთან ურთიერთობის აღსადგენად მზად არიან და განცხადებას თან დაურთო საქართველოს დამახინჯებული რუკა, სადაც ოკუპირებული ტერიტორიები ჩვენს შემადგენლობაში არ არის მოქცეული. მოკლე განცხადებაში ჯერ სააკაშვილის მმართველობის პერიოდი "დანაშაულებრივ რეჟიმად" არის მოხსენიებული, შემდეგ კი იმედოვნებენ, რომ "თბილისში საღი აზრი გაიმარჯვებს".

ამ განცხადებას კი წინ რუსული პროპაგანდის პოსტი უძღვის, სადაც ისევ ის არის ნათქვამი, , თითქოს, ომი საქართველომ დაიწყო და რუსეთმა სააკაშვილის რეჟიმის აგრესიისგან იხსნა საქართველოს ის ტერიტორიები, რომელიც ახლა თავად აქვს ოკუპირებული.