საქართველოს ვიცე-პრემიერი და ენერგეტიკის მინისტრი, კახა კალაძე ამბობს, რომ მედიის დღევანდელი მდგომარეობა, მას როგორც მაყურებელს აკმაყოფილებს და მასში "შფოთს" არ იწვევს. მისი თქმით, ქვეყანაში ბევრი მაუწყებელი და მედიაგამოცემაა და ისინი მუშაობენ ცენზურის გარეშე. ამის შესახებ კალაძე ფეისბუკგვერდით მიმართვის დროს მედია-ომბუდსმენის ინსტიტუტის შექმნაზე საუბრისას განაცხადა.

"ამის ფონზე სამართლებრივი დავა, რუსთავი 2-ის გამო, რომელიც ერთ-ერთი მხარის მიერ შეიფუთა, როგორც თავისუფალი სიტყვის აპოკალიფსი, თვალსაჩინოს ხდის, მედიაში მიმდინარე პროცესები დემოკრატიის, სიტყვის თავისუფლების, სწორი ინფორმაციის გავრცელების სავალდებულო ჩარჩოებს რომ არ გასცდეს, ან მათ მუშაობაში გარეშე ძალის ჩარევა არ მოხდეს, საჭიროა, ერთგვარი მონიტორინგი. უფრო სწორად, წარმმართველი იდეა, კონცეფცია, რომელიც ამ ვნებებს და ქაოსს წესრიგში მოიყვანს," - აღნიშნავს კალაძე, რომლის თქმითაც, მედია-ომბუდსმენის მუშაობით მედიის ხარისხი გაიზრდება.

მისი თქმით, მედიის თავისუფლებაზე მიუთითებს 2012 წლამდე და მას შემდეგ მაუწყებლობისთვის გაცემული ლიცენზიები. საქართველო ციფრულ მაუწყებლობაზე 2015 წლიდან გადავიდა, რაც იმას ნიშნავს, რომ ტელემაუწყებლობის დასაწყებად შეზღუდული სიხშირული სპექტრი აღარაა და მაუწყებლობის დაწყება გამარტივდა.

გუშინ, საქართველოს პრემიერ-მინისტრი, გიორგი კვირიკაშვილი საქართველოში მედია-ომბუდსმენის შექმნის ინიციატივით გამოვიდა. მისი აზრით, ამ ინსტიტუტში მოიწვევენ მსოფლიოში ყველაზე მაღალი რეპუტაციის მქონე მედიის უფლებადამცველებს.