დონალდ ტრამპმა ხელი მოაწერა აღმასრულებელ ბრძანებას, რომლითაც აშშ-ს განათლების დეპარტამენტის ლიკვიდაციის პროცესი დაიწყო. ამის შესახებ BBC წერს.

თეთრ სახლში აღმასრულებელი ბრძანების — "საგანმანათლებლო მიღწევების გაუმჯობესება მშობლების, შტატების და ადგილობრივი თემების გაძლიერებით" ხელმოწერის ცერემონია გაიმართა, რომელსაც ესწრებოდნენ გუბერნატორები, სახელმწიფო განათლების წარმომადგენლები და სკოლის მოსწავლეები.

ოვალურ კაბინეტში მოაწყვეს სკოლის კლასი, ტრამპისთვის ცალკე მერხით.

"ჩვენ ვაპირებთ მის დახურვას რაც შეიძლება მალე", — თქვა აშშ-ს პრეზიდენტმა. "ის არაფერ კარგს არ გვაძლევს".

ტრამპი, ისევე როგორც რესპუბლიკელების უმეტესობა, დიდი ხანია ითხოვს დეპარტამენტის დახურვას, მაგრამ მისი სრული გაუქმება კონგრესის თანხმობას მოითხოვს, რაც ნაკლებად სავარაუდოა, ამბობენ BBC-ის კორესპონდენტები ვაშინგტონში.

ტრამპმა თქვა, რომ შეერთებული შტატები უფრო მეტ ფულს ხარჯავს განათლებაზე, ვიდრე მსოფლიოს ნებისმიერი სხვა ქვეყანა, თუმცა ამერიკელი სტუდენტები აკადემიური მოსწრებით სხვებს ჩამორჩებიან.

"მიუხედავად იმისა, რომ განათლების დეპარტამენტი არავის ასწავლის, მას აქვს საზოგადოებასთან ურთიერთობის განყოფილება, რომელშიც 80-ზე მეტი თანამშრომელია, რაც მას წელიწადში 10 მილიონ დოლარზე მეტი უჯდება", — ნათქვამია ბრძანებულებაში.

თეთრ სახლში გამართულ ცერემონიაზე ტრამპმა შეაქო განათლების დეპარტამენტის ხელმძღვანელი ლინდა მაკმაჰონი, რომელიც მანამდე მან დანიშნა ამ თანამდებობაზე და იმედი გამოთქვა, რომ ის ბოლო განათლების დეპარტამენტის ხელმძღვანელი იქნება. ტრამპმა ასევე შეჰპირდა მას, რომ ადმინისტრაციაში სხვა სამუშაოს უპოვის.