საქართველომ სტრასბურგის ადამიანის უფლებათა სასამართლოში წააგო ილიას უნივერსიტეტის ლექტორის ყოფილი ქმრის მიერ მკვლელობის საქმე. კერძოდ, სასამართლომ მიიჩნია, რომ საქართველოს ხელისუფლებამ ვერ დაიცვა მოსარჩლის შვილი ოჯახში ძალადობისგან და ვერ გამოიძია საქმე შესაბამისად. გარდა ამისა, სასამართლომ დაადგინა, რომ გარდაცვლილის დედას, ანუ მოსარჩლეს ზიანის ანაზღაურების სახით სახელმწიფომ 35 ათასი ევრო უნდა გადაუხადოს.

სტრასბურგის სასამართლოს გადაწყვეტილებაში აღნიშნულია ისიც, რომ შინაგან საქმეთა სამინისტროს ჰქონდა ინფორმაცია ყოფილი ქმრის მხრიდან ქალზე ძალადობის შესახებ. კერძოდ, წერია, რომ 2014 წლის აპრილსა და სექტემბერში ქალმა და მისი ოჯახის წევრებმა მიმართეს უწყებას მუქარისა და შეურაცხყოფის გამო და ზომების გატარება მოითხოვეს, თუმცა შსს-მ ეს "მცირე ოჯახურ კონფლიქტად" მიიჩნია.

"სასამართლომ დაადგინა, რომ პოლიციამ იცოდა, გარდაცვლილი საფრთხის ქვეშ იმყოფებოდა. მიუხედავად სხვადასხვა დამცავი ღონისძიებისა, რომლის განხროციელებაც შეეძლოთ, მათ ვერ მოახერხეს, თავიდან აეცილებინათ გენდერული ნიშნით ძალადობა, რაც მისი სიკვდილით დასრულდა. სასამართლო მიიჩნევს, რომ პოლიციის უმოქმედობა შეიძლება ჩაითვალოს სისტემურ მარცხად. აუცილებელი იყო გამოძიება, იყო თუ არა გენდერული ნიშნით დისკრიმინაცია და მიკერძოება პოლიციის უმოქმედობის უკან", — წერია განცხადებაში.

ილიას სახელწმიფო უნივერსიტეტის ლექტორი, მაკა წივწივაძე ყოფილმა ქმარმა სამსახურში 2014 წლის ოქტომბერში მოკლა. ის ილიას უნივერსიტეტის C კორპუსში მივიდა და ქალს ცეცხლსასროლი იარაღით რამდენიმე ჭრილობა მიაყენა, რის შემდეგაც თავი მოიკლა. დაჭრილი ქალი რესპუბლიკურ საავადმყოფოში გადაიყვანეს, თუმცა მისი გადარჩენა ვერ მოხერხდა. ექიმის განცხადებით, სიკვდილი თავის ტვინის სიცოცხლესთან შეუთავსებელმა დაზიანებამ გამოიწვია.