ჟენევაში აშშ-სა და რუსეთის პრეზიდენტების სამიტი დაიწყო. როგორც ცნობილია, მოლაპარაკებები შესაძლოა რამდენიმე საათს გაგრძელდეს. ორივე მათგან ვილა ლა გრანჟში შვეიცარიის პრეზიდენტი, გაი პარმელენი შეხვდა.

შეხვედრა როგორც ვიწრო, ისე ფართო ფორმატებით წარიმართება. გავრცელებული ინფორმაციით, პრეზიდენტებს ერთობლივი პრესკონფერენცია არ ექნებათ. მოსალოდნელია, რომ ისინი უსაფრთხოებაზე, უკრაინაზე, ბელარუსსა და ოპოზიციონერ ალექსეი ნავალნიზე ისაუბრებენ.

"მოგესალმებით ჟენევაში, მშვიდობის ქალაქში. შვეიცარიისთვის დიდი პატივია თქვენი მიღება სამიტზე და კარგი ტრადიციების შესაბამისად, ხელი შეუწყოს დიალოგსა და ურთიერთგაგებას. ორივე პრეზიდენტს გისურვებთ ნაყოფიერ დიალოგს თქვენი ქვეყნებისა და მსოფლიოს ინტერესებში", — განაცხადა შვეიცარიის პრეზიდენტმა.

ვლადიმერ პუტინი ჟენევაში ჩასვლისას

ფოტო: AP

ჯო ბაიდენი შვეიცარიის პრეზიდენტთან

ფოტო: AP

ვლადიმერ პუტინი შვეიცარიის პრეზიდენტთან

ფოტო: AP

ბაინდენისა და პუტინის ბოლო მოლაპარაკებები 2011 წელს იყო, როცა ბაიდენი ვიცე-პრეზიდენტი იყო, ხოლო პუტინი პრემიერმინისტრი.

აშშ-ს პრეზიდენტი რუსეთის ლიდერს თავისი პირველი საერთაშორისო ვიზიტის ფარგლებში ხვდება, რომელიც მან ევროპიდან დაიწყო. ამ ვიზიტის განმავლობაში მან დიდი შვიდეულისა და NATO-სამიტებში მიიღო მონაწილეობა.

პუტინის მრჩეველი საერთაშორისო საკითხებში, იური უშაკოვი ამბობს, რომ აშშ-სა და რუსეთს შორის ურთიერთობა "ჩიხში შევიდა" და ოპტიმიზმისთვის არც ისე ბევრი საფუძველია.

ამ ეტაპისთის ორივე ქვეყანას თავისი ელჩები გაწვეული ჰყავს, ხოლო რუსეთმა აშშ "არამეგობარი ქვეყნების" სიაში შეიყვანა. თუმცა პუტინის თქმით, არსებობს საკითხები, რაზეც შეუძლიათ თანამშრომლობა, მათ შორისაა სირიისა კონფლიქტი, ბირთვული შეიარაღება და კლიმატის ცვლილება.

ბაიდენის თქმით, ეს მნიშვნელოვანი ნაბიჯია, რათა ორმა ქვეყანამ ურთიერთობაში სტაბილურობა იპოვოს.