"მინდა გითხრათ, რომ თვითონ დავით აღმაშენებელი ძალიან უკმაყოფილო დარჩებოდა, რომ სცოდნოდა თქვენი ინიციატივის შესახებ", — ასე შეაფასა ქართული ოცნების დეპუტატმა, არჩილ თალაკვაძემ სტრატეგია აღმაშენებელის ლიდერის, გიორგი ვაშაძის ინიციატივა, დაბრუნდეს ძველი სანქციები წვრილმან ხულიგნობასა და პოლიციისადმი დაუმორჩლებლობის ადმინისტრაციულ სამართალდარღვევაზე. თალაკვაძის თქმით, განვითარებული, დემოკრატიული ქვეყნები, პოლიციის საქმიანობის შემასუსტებელ ინიციატივებს არ აყენებენ.

"ჩემთვის საოცარია, რომ პოლიციის დღეს ოპოზიციის წარმომადგენელი, ერთ-ერთი ოპოზიციური პარტია სტრატეგია აღმაშენებელი ასე ულოცავს და ასე შეხვდა პოლიციის დღეს, რომ პირდაპირ ინიციატივა შემოაქვს და დაჩქარებული წესით ითხოვს განხილვას. თურმე უნდა შევარბილოთ სანქციები იმაზე, რასაც აქ თვეების განმავლობაში ვხედავდით, რომ თქვენი ოპოზიციონერი კოლეგები ხან შეურაცხყოფას აყენებდნენ პოლიციელებს, რომ აღარაფერი ვთქვათ იმ მოვლენებზე, რომ საათების განმავლობაში ფიზიკური შეტევა ხორციელდებოდა პოლიციელებზე.

ხალხი ნუ შეგყავთ შეცდომაში. არავითარი სამოქალაქო უფლებების გაუმჯობესება არ არის თქვენი ინიციატივა, სამოქალაქო უფლებების მშვიდობიანი პროტესტით იმ ადამიანებს, ვინც კანონის დაცვით მანიფესტაციას ატარებს, არაფერს არ უზღუდავს ეს საკანონმდებლო ნორმები. მინდა გითხრათ, რომ თვითონ დავით აღმაშენებელი ძალიან უკმაყოფილო დარჩებოდა, რომ სცოდნოდა თქვენი ინიციატივის შესახებ", — განაცხადა არჩილ თალაკვაძემ.

ვაშაძე აღნიშნავს, რომ კანონში ამ ცვლილებებმა ადამიანის უფლებების გაუარესებას შეეწყო ხელი. მისივე თქმით, არ ითხოვენ არსებული სანქციების შემსუბუქებას, არამედ სურთ, რომ დაბრუნდეს ძველი სანქციები და საჭიროა, რომ ეს დაჩქარებულად მოხდეს.

ცვლილებები ადმინისტრაციულ კოდექსში

29 აპრილს პარლამენტმა ადმინისტრაციულ სამართალდარღვევათა კოდექსში ცვლილებები მესამე მოსმენით დაამტკიცა. კანონპროექტს საკანონმდებლო ორგანო დაჩქარებულად განიხილავდა. ცვლილებები 2021 წლის პირველი ივნისიდან ამოქმედდება.

ახალი კანონპროექტის თანახმად, ადმინისტრაციულ სამართალდარღვევათა კოდექსში ცვლილებები შედის, რის შედეგადაც წვრილმანი ხულიგნობისა (166-ე მუხლი) და სამართალდამცველის მოთხოვნისადმი დაუმორჩილებლობისთვის (173-ე მუხლი) სანქციები იზრდება.

წვრილმან ხულიგნობაზე პირველი ადმინისტრაციული დარღვევის შემთხვევაში, სანქცია რჩება იგივე, ანუ 500-დან 1000 ლარამდე ჯარიმა ან 15 დღემდე პატიმრობა. განმეორებითი სამართალდარღვევის შემთხვევაში ჯარიმა იქნება 1 500-დან 2 000 ლარამდე ან 5-დან 15 დღემდე პატიმრობა.

რაც შეეხება სამართალდამცველის მოთხოვნისადმი დაუმორჩილებლობისთვის, აღნიშნული სამართალდარღვევა გამოიწვევს დაჯარიმებას 2 000-დან 3 000 ლარამდე ან პატიმრობას 15 დღემდე ვადით. განმეორების შემთხვევაში 3 500 ლარიდან 4 500-ლარამდე ჯარიმა ან 7-დან 15 დღემდე პატიმრობა.

ამასთან ცვლილება ეხება პატიმრობასაც. 247-ე მუხლი ჩამოყალიბდა შემდეგი რედაქციით:

1. ადმინისტრაციული დაკავების დროს, დაკავებული პირი პირველი შესაძლებლობისთანავე, მაგრამ არა უგვიანეს 24 საათისა წარედგინება სასამართლოს.
2. მტკიცებულების მოპოვების მიზნით, ამ მუხლის პირველი ნაწილით გათვალისწინებული ვადა შეიძლება ერთჯერადად გახანგრძლივდეს არაუმეტეს 24 საათით. ამ შემთხვევაში უფლებამოსილი ორგანოს შესაბამისი თანამშრომელი წერილობით ასაბუთებს ადმინისტრაციული დაკავების ვადის გახანგრძლივების მიზანშეწონილობას.
3. თუ დაკავებული პირი ამ მუხლის პირველი ან მეორე ნაწილით გათვალისწინებულ ვადაში არ წარედგინა სასამართლოს, იგი დაუყოვნებლივ უნდა გათავისუფლდეს.
4. დაკავებული პირი სასამართლოსთვის წარდგენამდე უფლებამოსილმა ორგანომ შეიძლება მოათავსოს დროებით მოთავსების იზოლატორში.