შინაგან საქმეთა მინისტრის, ვახტანგ გომელაურის განცხადებით, საჭიროების შემთხვევაში სპეციალური დანიშნულების რაზმს უფლება აქვს, რომ გუმათში პროტესტის მონაწილეების წინააღმდეგ წყლის ჭავლი და გაზიც გამოიყენოს.

გომელაური ამბობს, რომ პოლიციელები გუმათში დგანან იმისთვის, რომ დაპირისპირება არ მოხდეს. გარდა ამისა, ის აღნიშნავს, რომ 30 მაისს აქციაზე ერთ-ერთ პოლიციელს დაარტყეს.

"სპეცდანიშნულების რაზმს რაც აქვს აღჭურვილობა — მათ შორის გაზი იქნება, წყლის ჭავლი იქნება, — თუ საჭირო იქნება, თუ მოხდება ძალადობა პოლიციაზე, მათ კანონიერი უფლება აქვთ, ყველაფერი გამოიყენონ", — თქვა გომელაურმა.

რიონის ხეობის აქტივისტები გუმათჰესთან არიან შეკრებილნი. ისინი ცდილობენ, კომპანიის მანქანებსა და თანამშრომლებს გადაადგილებაში ხელი შეუშალონ.

გუმათჰესთან ხმაური იყო 30 მაისის ღამესაც. ჰესის მშენებლობის მოწინააღმდეგეები ადგილზე აღმართულ რკინის ბარიკადებზე აბრახუნებდნენ და ჯებირების მიღმა გასვლას ცდილობდნენ.

ისინი ტყის ბილიკით შეეცადნენ ხეობაში მოხვედრას, თუმცა სამართალდამცავებმა მათ ამის საშუალება არ მისცეს. სამართალდამცავები აქტივისტებს დაედევნენ და ბარიკადებს მიღმა მოაბრუნეს. პროტესტის ერთ-ერთი ლიდერის, ვარლამ გოლეთიანის თქმით, ტყის ბილიკით გადასვლას 50-მდე ადამიანი ცდილობდა. მისივე თქმით, ეს ერთგვარი სიმბოლური აქტი იყო.

გუმათჰესთან პოლიცია მას შემდეგ არის განლაგებული, რაც სოფელ ნამოხვანში ხეობის აქტივისტებს კარვები დაუშალეს და იქ დაბრუნების საშუალებას არ აძლევენ. რკინის ბარიკადებში მხოლოდ ადგილობრივ მოსახლეობას ატარებენ, თუმცა აქციის მონაწილეებს სახლში წასასვლელად შემოვლითი გზის გამოყენება უწევთ. ბარიკადებს პოლიცია ამაგრებს, რომელთან რაოდენობაც საღამოობით იზრდება.