კრემლში აცხადებენ, რომ აშშ-ს პრეზიდენტი ჯო ბაიდენი და რუსეთის პრეზიდენტი ვლადიმერ პუტინი შესაძლოა ერთმანეთს ზაფხულში შეხვდნენ. ამის შესახებ პრესსპიკერმა დმიტრი პესკოვმა ჟურნალისტებთან განაცხადა.

"მართლაც, გარკვეული წინადადებები იყო გაჟღერებული, თარიღების დადასტურება ჯერჯერობით არ შემიძლია. ჯერ რაიმე შეთანხმება თარიღებზე არაა. საუბარი რეალურად მიდის ზაფხულის თვეებზე. კიდევ ბევრი სხვადასხვა ფაქტორის ანალიზი იქნება საჭირო, რათა რაიმე საბოლოო შეთანხმებაზე გავიდეთ", — განაცხადა პესკოვმა.

მისივე თქმით, ჯერ არ თქმულა ის ქვეყანაც, სადაც შეიძლება ეს შეხვედრა ჩატარდეს.

პუტინმა და ბაიდენმა ტელეფონით 13 აპრილს ისაუბრეს. თეთრი სახლის ინფორმაციით, აშშ-ს პრეზიდენტმა იდეა გამოთქვა, რომ რუსეთ-ამერიკის სამიტი მესამე ქვეყანაში გაიმართოს.