რუსეთის საგარეო საქმეთა სამინისტროს ოფიციალური წარმომადგენლის, მარია ზახაროვას განცხადებით, აშშ "არამეგობარი ქვეყნების" სიას მოხვდება. ინფორმაციას ამის შესახებ BBC-ის რუსული სამსახური ავრცელებს.

23 აპრილს პრეზიდენტმა ვლადიმერ პუტინმა ხელი მოაწერა განკარგულებას, რომლის თანახმადაც, შეიქმნა იმ ქვეყნების სია, რომლებიც რუსეთის მიმართ "არამეგობრულ ქმედებებს" ახორციელებს. ასეთი ქვეყნების დიპლომატიურ მისიებს რუსეთის მოქალაქეების სამსახურში აყვანა აეკრძალებათ.

პუტინმა გადაწყვეტილება მას შემდეგ მიიღო, რაც ჩეხეთმა რუსი დიპლომატების გაძევება დაიწყო. ჩეხეთის მთავრობაში აცხადებენ, რომ 2014 წელს საბრძოლო მასალების საცავში აფეთქებასთან რუსეთის დაზვერვის კავშირი გამოიკვეთა.

ზახაროვას თქმით, მთავრობა "არამეგობარი ქვეყნების" სიაზე ჯერ კიდევ მუშაობს, თუმცა როსია 1-ის ეთერში მან აღნიშნა, ერთ-ერთი ასეთი ქვეყანა აშშ იქნება.