ევროკავშირი იმედგარუებას გამოხატავს საქართველოში მოსამართლეთა შერჩევის წესის ნაჩქარევად შემუშავებისა და მიღების გამო და ქვეყანას მოუწოდებს, რომ ვენეციის კომისიას ჰკითხოს, შეესაბამება თუ არა ეს ცვლილებები, მათ წინა რეკომენდაციებს. ამავდროულად, განცხადებაში აღნიშნულია, რომ კომისიის რეკომენდაციების გათვალისწინება საქართველოსთვის მაკროსაფინანსო დახმარების მისაღები პირობაა.

ევროკავშირის განცხადება საგარეო საქმეთა და უსაფრთხოების პოლიტიკის პრესსპიკერმა, ნაბილა მასრალიმ გაავრცელა:

"1 აპრილს საქართველოს პარლამენტმა მიიღო საკანონმდებლო ცვლილებები, რომლებშიც უზენაესი სასამართლოს მოსამართლეთა შერჩევის პროცედურები არის გადახედული. ევროკავშირმა არაერთხელ გამოხატა შეშფოთება შერჩევის პროცესში არსებულ ხარვეზებსა და გამოყენებული წესებზე.

მაშინ, როცა ევროკავშირი მიესალმება შერჩევის პროცესის საკანომდებლო ცვლილებების ინიციატივას, იმედგაცრუებას იწვევს ის, რომ საქართველოს პარლამენტმა ნაჩქარევად შეიმუშავა და მიიღო ეს ცვლილებები ყოველმხრივი კონსულტაციების პროცესის გარეშე. ვწუხვართ, რომ საქართველომ ეს კანონმდებლობა ადრეც შეცვალა დაჩქარებულად, ვენეციის კომისიისადმი დროული განაცხადის გაგზავნის ან მისი საბოლოო დასკვნისთვის დალოდების გარეშე".

ევროკავშირის განცხადებით, უკიდურესად მნიშვნელოვანია, რომ საქართველოს სასამართლო პროფესიონალი და კეთილსინდისიერი მოსამართლეებით დაკომპლექტდეს და შერჩევის წესი ყველა კანდიდატზე თანაბრად ვრცელდებოდეს.

"ამიტომ ევროპის კავშირი დაჟინებით ურჩევს საქართველოს, რაც შეიძლება სწრაფად მოსთხოვოს ვენეციის კომისიას იმის შეფასება, შეესაბამება თუ არა მიღებული შესწორებები, მათ წინა რეკომენდაციებს. ახალი წესები, რომელსაც ვენეციის კომისია დამტკიცებს, ერთნაირად უნდა გამოიყენებოდეს ყველა განმცხადებელზე.

უკიდურესად მნიშვნელოვანია, რომ უზენაესი სასამართლო, საქართველოს უმაღლესი სასამართლო ინსტანცია, დაკომპლექტდეს უმაღლესი პროფესიონალური დონისა და კეთილსინდისიერების მოსამართლეებისგან. ვენეციის კომისიის რეკომენდაციების შესაბამისად, უზენაესი სასამართლოს მოსამართლეთა შერჩევის პროცესის გადახედვა არის პირობაც მიმდინარე პროგრამის ფარგლებში საქართველოსთვის მაკროსაფინანსო დახმარების მეორე ტრანშის გამოსაყოფად", — ვკითხულობთ განცხადებაში.