ოპოზიციონერ პოლიტიკოსის ალექსეი ნავალნის საქმის გამო ამერიკელი სენატორების ჯგუფი დემოკრატიული და რესპუბლიკური პარტიებიდან რუსი მაღალჩინოსნებისთვის სანქციების დაწესებას მოითხოვს. მათ შესაბამისი კანონპროექტი კონგრესს უკვე წარუდგინეს.

კანონპროექტი ითვალისწინებს სანქციებს იმ პირების მიმართ, რომლებსაც ნავალნის მოწამვლასთან და რუსეთის ტერიტორიაზე ნოვიჩიკოს ჯგუფის საწამლავის გამოყენებასთან კავშირი აქვთ. გარდა ამისა, პროექტის ავტორები მოითხოვენ, ალექსეი ნავალნისა და სხვა პოლიპატიმრების გათავისუფლებას, ბორის ნემცოვის მკვლელობასა და პრეზიდენტ ვლადიმერ პუტინის ქონებაზე ანგარიშების მომზადებას. სენატორები ითხოვენ, რომ გერმანიას მოუწოდონ, შეაჩერონ გაზსადენი ჩრდილოეთის 2-ის მშენებლობა.

2 თებერვალს მოსკოვის სასამართლომ ალექსეი ნავალნის პირობითი მსჯავრი რეალურით ჩაანაცვლა და მას 2 წლითა და რვა თვით თავისუფლების აღკვეთა მიუსაჯა. სასამართლომ მიიჩნია, რომ ნავალნი პირობითი გათავისუფლების წესებს არღვევდა, ამიტომ დარჩენილი ვადა პატიმრობაზე შეუცვალა.

ალექსეი ნავალნი მოსკოვის აეროპორტში 17 იანვარს დააკავეს, როცა ის გერმანიიდან ბრუნდებოდა, სადაც ნოვიჩოკით მოწამვლის შემდეგ მკურნალობდა. დაკავებიდან მეორე დღეს პოლიციის განყოფილებაში გამართულ სასამართლო პროცესზე მას 30-დღიანი პატიმრობა შეუფარდეს.

11 იანვარს რუსეთში სასჯელის აღსრულების ფედერალურმა ბიურომ სასამართლოს მიმართა, რომ ნავალნის პირობითი მსჯავრი, რომელიც მან ივ როშეს საქმეზე მიიღო, რეალურით ჩანაცვლდეს. ამასთან, რუსეთში ოპოზიციონერის წინააღმდეგ თაღლითობის მუხლით საქმე აღძრეს. საგამოძიებო უწყებები მას საკუთარი ფონდებიდან ფულის გაფლანგავს ედავებიან.