შინაგან საქმეთა მინისტრი, ვახტანგ გომელაური ამბობს, რომ ე.წ. კარტოგრაფების საქმეზე ბრალდებულები, ივერი მელაშვილი და ნატალია ილიჩოვას პოლიტიკურ პატიმრებს ვერ უწოდებს.

„პოლიტიკურ პატიმრებს, რა თქმა უნდა, ვერ დავარქმევდი მათ. ყველა ადამიანი თანასწორია და თუ დააშავა რომელიმემ, პასუხი უნდა აგოს, ეს იქნება მინისტრი, პრემიერ მინისტრი, რიგითი თანამშრომელი თუ დეპარტამენტის თანამშრომელი", — განაცხადა გომელაურმა.

სასამართლოს გადაწყვეტილებას, მელაშვილის და ილიჩოვას გირაოს სანაცვლოდ გათავისუფლების შესახებ, გომელაური იმით ხსნის, რომ აღარ არსებობს მტკიცებულებების განადგურების საფრთხე

"პროკურატურამ ჩათვალა საჭიროდ, რომ ამ ადამიანების მიმართ პატიმრობით შესულიყვნენ და დააკავეს. მტკიცებულებები და საფუძვლები ჰქონდათ და პატიმრობით შევიდნენ, ახლა გადაწყვიტეს, რომ გირაოთი შესულიყვნენ დაუკმაყოფილა სასამართლომ.

აღარ იყო მტკიცებულების განადგურების საფრთხე და გირაო ჩათვალა ალბათ საჭიროდ. იცით რომ შინაგან საქმეთა სამინისტრო არ იძიებს მაგ საქმეს, იძიებს პროკურატურა, პროკურატურას რომ ჰკითხოთ, ისინი გეტყვიან უკეთესად", — განუცხადა გომელაურმა ჟურნალსიტებს.

დღეს ივერი მელაშვილი და ნატალია ილიჩოვა გირაოს სანაცვლოდ გაათავისუფლეს. თბილისის საქალაქო სასამართლომ ნაწილობრივ დააკმაყოფილა პროკურატურის შუამდგომლობა, რომელიც აღკვეთის ღონისძიების შეცვლას — პატიმრობის ნაცვლად გირაოს შეფარდებას გულისხმობდა. სასამართლომ თითოეულ ბრალდებულს 20 000-ლარიანი გირაო შეუფარდა. ამასთან, დააკმაყოფილა პროკურატურის შუამდგომლობა ივერი მელაშვილის თანამდებობიდან გადაყენების შესახებ, რადგან მიიჩნია, რომ ეს თანამდებობა პირდაპირ არის კავშირში საქმეში არსებულ ინფორმაციებთან.

სასამართლო დარბაზიდან გამოსულმა მელაშვილმა პირველი კომენტარი მედიასთან უკვე გააკეთა. მისი განცხადებით, ბრალდებები "აბსურდულია" და არ შეიძლება, რომ ქვეყანაში ეს "მარაზმი" გაგრძელდეს. მელაშვილმა აღნიშნა ისიც, რომ იგი გირაოს არ ეთანხმება, რადგან არც მას და არც ილიჩოვას არანაირი ბრალეულობა არ მიუძღვით.

კარტოგრაფების საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყნისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

• 1936-37 წლის რუკა უვარგისია, ვერ გამოდგება მეორე მხარესთან არგუმენტად — მელაშვილი
• დეკანოზი ჭიკაიძე: რუკებისთვის მამა კირიონმა ღარიბაშვილს მიმართა, რომლის თხოვნით ივანიშვილი ხიდაშელს დაუკავშირდა

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისიის წევრები დააკავეს. 9 ოქტომბერს კი ილიჩოვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

21 იანვარს პროკურატურამ ივერი მელაშვილის კაბინეტში ფარულად გადაღებული ვიდეომასალა გამოაქვეყნა, სადაც ბრალდებულისა და კიდევ ერთი პირის საუბარია აღბეჭდილი. პროკურორ ამირან გულუაშვილის მტკიცებით, ფარულ ჩანაწერებში ბრალდებული ივერი მელაშვილი ადასტურებს, რომ 2006 წლის აგვისტოს შეთანხმებისას დავით გარეჯის მიმდებარედ ქართულმა მხარემ საქართველოს თავდაპირველი პოზიცია უარყო.

გაიგეთ მეტი:

• "არანაირი დანაშაული არ არსებობს" — უკვე ყოფილი ელჩი გიგიაძე მელაშვილსა და ილიჩოვას გათავისუფლებას ულოცავს
• დიდი ოდენობით გირაო დააკისრეს და თანამდებობიდან გადაყენებით შემოსავლის გარეშეც დატოვეს — მელაშვილის ადვოკატი
• სრული პასუხისმგებლობით ვამბობ, ეს გათავისუფლება არის მოლაპარაკების შედეგი — ელისაშვილი მელაშვილსა და ილიჩოვაზე
• რაც კაბინეტში ჩაწერეს, იყო ჩვეულებრივი სამუშაო განხილვა, მეტი არაფერი — მელაშვილი