პარტია მოქალაქეების ლიდერი, ალეკო ელისაშვილი აცხადებს, რომ ე.წ. კარტოგრაფების საქმეზე დაკავებულების, ივერი მელაშვილისა და ნატალია ილიჩოვას გირაოთი გათავისუფლება მმართველ პარტიასა და ოპოზიციას შორის მოლაპარაკების შედეგია.

"საძაგლობაა როდესაც სახელმწიფო ტყუილ უბრალოდ აპატიმრებს ადამიანებს, მაგრამ კარგია რომ ქართული ოცნება გონს მოეგო და ისინი გაათავისუფლა. სრული პასუხისმგებლობით ვამბობ რომ ეს გათავისუფლება არის მოლაპარაკების შედეგი! დიახაც, მოლაპარაკებამ გამოიღო შედეგი და ეს არის კარგი. ეს არის ნაბიჯი მოლაპარაკების გაგრძელებისთვის და მხარეებს შორის ნდობის აღდგენისთვის! იშვიათად ვყოფილვარ დღევანდელივით გახარებული", — წერს ელისაშვილი საკუთარ ფეისბუქ გვერდზე.

22 იანვარს პარტია მოქალაქეების ლიდერები, ალეკო ელისაშვილი და ლევან იოსელიანი ქართულ ოცნებასთან ინდივიდუალურ მოლაპარაკებაზე, პარლამენტში მივიდნენ. შეხვედრის შემდეგ ისინი ამბობდნენ, რომ არჩილ თალაკვაძესთან და მამუკა მდინარაძესთან ყველაზე რთულად განსახილველი საკითხი პოლიტპატიმრების თემა იყო. ლევან იოსელიანმა თქვა, რომ მათ პრინციპულად, რამდენჯერმე დასვეს ეს საკითხი. არჩილ თალაკვაძემ განაცხადა, რომ პარლამენტი არ არის ის ადგილი, სადაც წყდება ვინ იყოს პატიმრობაში და ვინ არა, შესაბამისად, ამ თემაზე არ უსაუბრიათ. მამუკა მდინარაძემ ამ შეხვედრის დასრულებისთანავე და დღესაც, რამდენჯერმე ხაზგასმით აღნიშნა, რომ პოლიტპატიმრების თემაზე მოქალაქეების ლიდერებთან არ უსაუბრიათ.

მმართველ პარტიასთან მოლაპარაკებების პროცესში, ოპოზიციის ერთ-ერთი მთავარი მოთხოვნა პოლიტპატიმრების გათავისუფლებაა, რომელთა შორისაც მოაზრებენ ივერი მელაშვილსა და ნატალია ილიჩოვასაც. ქართული ოცნება ქვეყანაში პოლიტპატიმრების არსებობას უარყოფს.

გაიგეთ მეტი: