ჯანდაცვის მინისტრის მოადგილის, თამარ გაბუნიას განცხადებით, რემდესივირით მკურნალობა 29 პაციენტზე მიმდინარეობს. ის აღნიშნავს, მონაცემები გუშინდელია. მისივე თქმით, ჯანდაცვის წარმომადგენლები ფრთხილობენ რემდესივირსის დანიშვნას პაციენტებზე, რადგან ამისთვის საჭიროა დაკმაყოფილდეს გარკვეული კრიტერიუმები, მათ შორის პაციენტის ინფორმირებული თანხმობა.

"29 პაციენტზე იყო მოთხოვნა გაკეთებული, გუშინდელი მდგომარეობით, ანუ ფრთხილად ეკიდებიან ჯანდაცვის პროფესიონალები რემდესივირის დანიშვნას, ფრთხილად აქ ვგულისხმობ იმას, რომ არის გარკვეული კრიტერიუმები, რაც უნდა დაკმაყოფილდეს და აუცილებლად, პაციენტის ინფორმირებული თანხმობა სჭირდება რემდესივირის გამოყენებას. ამდენად, ბოლო 4 კვირის განმავლობაში, რაც ჩვენ დავიწყეთ რემდესივირის მოხმარება, 29 პაციენტია, ყველას მდგომარეობა დამაკმაყოფილებელია, თუმცა რამდენად ეს უკავშირდება რემდესივირის ეფექტს, ამის თქმა, მხოლოდ ამ მონაცემების საფუძველზე, რა თქმა უნდა, ჩვენ არ შეგვიძლია", — აცხადებს გაბუნია.

18 დეკემბერს, ჯანდაცვის მინისტრმა, ეკატერინე ტიკარაძემ, განაცხადა, რომ საქართველოში უკვე ჩამოტანილია რემდესივირი. ტიკარაძე ამბობს, რომ პრეპარატს შესაბამის პაციენტებზე კლინიკური ჯგუფი გადაანაწილებს.

ტიკარაძემ 8 დეკემბერს განაცხადა, რომ პრეპარატი თვის ბოლომდე იქნებოდა ქვეყანაში.

დაავადებათა კონტროლის ეროვნული ცენტრის დირექტორმა, ამირან გამყრელიძემ 13 ნოემბერს განაცხადა, რომ ეს პრეპარატი ქვეყანაში 2 კვირაში შემოვიდოდა, თუმცა მანამდე ბევრად უფრო ადრე, ჯანდაცვის მინისტრი მოადგილე 5 მაისს ამბობდა, რომ პრეპარატი მაისის ბოლოს იქნებოდა ხელმისაწვდომი.

გაიგეთ მეტი: