ოკუპირებულ ახალგორში მცხოვრები, თამარ მეარაყიშვილი საქართველოს პრემიერმინისტრ გიორგი გახარიას მიმართავს და მასთან შეხვედრას ითხოვს. როგორც სამოქალაქო აქტივისტმა On.ge-ს უთხრა, ახალგორში არსებულ პრობლემებზე სასაუბროდ პრემიერმინისტრს მან არაერთხელ მიმართა.

"არაერთხელ მოგმართეთ ღია წერილით, სატელევიზიო სივრციდან, რომ დაგეთმოთ რამდენიმე წუთი და მოგესმინათ ჩემთვის. მე ახალგორელებისგან მაქვს უფლება დაგლაპარაკებოდით მათი სახელით, მაგრამ ჩემმა სურვილმა თქვენამდე ვერ მოაღწია. მძიმე მდგომარეობაში ვართ. ძალიან მძიმე მდგომარეობაში. გთხოვთ, დაგველაპარაკოთ", — წერს თამარ მეარაყიშვილი ფეისბუქში.

გიორგი გახარიას დღეს პარლამენტში ფრაქცია ქართული ოცნების სხდომაზე უსმენდნენ. ოკუპირებულ ტერიტორიებზე მცხოვრები საქართველოს მოქალაქეებზე საუბრისას მან აღნიშნა, რომ სოციალური დახმარების თვალსაზრისით საკმაოდ სერიოზული პროგრამებისთვის არიან მზად, თუმცა თქვა, რომ წვდომა საკმაოდ დიდი პრობლემაა.

"მოგეხსენებათ, წვდომა ძირითადი გამოწვევაა, რაზეც საქართველოს ხელისუფლება ჩვენს საერთაშორისო პარტნიორებთან ვმუშაობთ ადამიანის უფლებების საბაზისო მოთხოვნების დასაცავად. მათ შორის, ეს არის სერიოზული გამოწვევა, რომელზე მუშაობასაც გავაგრძელებთ", — განაცხადა გახარიამ.

კონფლიქტის ზონაში, ახალგორსა და გალის რაიონში ჰუმანიტარული მდგომარეობა კორონავირუსის პანდემიის შემდეგ კიდევ უფრო დამძიმდა. ჩაკეტილი ე.წ. საზღვრის გამო ოკუპირებულ ტერიტორიებზე მცხოვრებ ეთნიკურად ქართველებს ცენტრალური ხელისუფლების მიერ კონტროლირებად ტერიტორიაზე გადმოსვლის საშუალება არ აქვთ. შესაბამისად, ვერ იღებენ პენსიებს, სოციალურ შემწეობებს, შეზღუდული აქვთ წვდომა ხარისხიან სამედიცინო სერვისებთანაც.

გაიგეთ მეტი: