ირაკლი კობახიძე საქართველოში გერმანიის ელჩის, პეტერ ფიშერის უფლებამოსილების ვადის ამოწურვას გამოეხმაურა. მისი თქმით, "ტრადიციულად საქართველოსა და გერმანიას შორის იყო ჩამოყალიბებული განსაკუთრებული ურთიერთობები", თუმცა "ბატონი ფიშერი იყო ერთადერთი ელჩი, რომელმაც არა თუ არაფერი გააკეთა ამ ურთიერთობების განვითარებისთვის, არამედ პირიქით — ყველაფერს აკეთებდა იმისათვის, რომ დაზიანებულიყო ურთიერთობები საქართველოსა და გერმანიის ფედერაციულ რესპუბლიკას შორის".

"ტრადიციულად საქართველოსა და გერმანიას შორის იყო ჩამოყალიბებული განსაკუთრებული ურთიერთობები. ძალიან დიდი როლი შეასრულა გერმანიამ, განსაკუთრებით ოთხმოცდაათიანი წლების დასაწყისში ჩვენი ქვეყნის განვითარებაში. მაშინ ძალიან რთული პერიოდი იყო და მაშინ გერმანია გვერდში ედგა ჩვენს ქვეყანას და ასე გრძელდებოდა ურთიერთობები წლების განმავლობაში.

და, პრინციპში, ბატონი ფიშერი იყო ერთადერთი ელჩი, რომელმაც არა თუ არაფერი გააკეთა ამ ურთიერთობების განვითარებისთვის, არამედ პირიქით — ყველაფერს აკეთებდა იმისათვის, რომ დაზიანებულიყო ურთიერთობები საქართველოსა და გერმანიის ფედერაციულ რესპუბლიკას შორის, რაც ძალიან სამწუხაროა.

ჩვენ იმედი გვაქვს, რომ ეს ყველაფერი შებრუნდება, ეს არის ძალიან მნიშვნელოვანი ჩვენი ქვეყნისთვის. კიდევ ერთხელ გავიმეორებ, რომ ჩვენ მადლიერი ვართ გერმანიის წლების მანძილზე ძალიან მნიშვნელოვანი მხარდაჭერის გამო და ჩვენ გვაქვს ძალიან დიდი სურვილი, რომ აღდგეს მეგობრული ურთიერთობები, რასაც ვიყავით მანამდე მიჩვეული. კიდევ ერთხელ ვიტყვი, რომ სამწუხაროდ ბატონმა ფიშერმა დიდი ზიანი მიაყენა ამ ურთიერთობებს. იმედი გვაქვს, რომ ეს ყველაფერი შეიცვლება", — განაცხადა ირაკლი კობახიძემ.

დღეს, გერმანისს ელჩმა საქართველოში, პეტერ ფიშერმა სოციალურ ქსელ X-ზე დაწერა, რომ მათი უფლებამოსილების ვადა საქართველოში დასრულდა. მან გამოსამშვიდობებელ წერილთან ერთად 9 აპრილს გადაღებული ფოტო გამოაქვეყნა.

"ჩვენი უფლებამოსილების ვადა საქართველოში დასრულდა. მადლობა, ბედნიერად და Auf Wiedersehen, — დაწერა პეტერ ფიშერმა.

პიტერ ფიშერი საქართველოში გერმანიის ელჩის თანამდებობად 2022 წლიდან იკავებდა.