მიხეილ ყაველაშვილი თეირანში ირანის სულიერი ლიდერის, აიათოლა ალი ხამენეის დაკრძალვაზე მიიწვიეს. ამის შესახებ ინფორმაციას თეირანში დაფუძნებული საინფორმაციო სააგენტო WANA News ავრცელებს. მათი ცნობით, ყაველაშვილი დაკრძალვის ცერემონიაზე ოფიციალურ დელეგაციას უხელმძღვანელებს.

ირანული მედია წერს, რომ ღონისძიებებზე, რომლებიც რამდენიმე დღის განმავლობაში თეირანში, ყუმში, მაშჰადსა და ერაყში გაიმართება, რეგიონის მასშტაბით რამდენიმე მაღალი თანამდებობის პირისა და მაღალი რანგის დელეგაციის დასწრებაა მოსალოდნელი. მათ შორის არიან: საქართველოს პრეზიდენტი მიხეილ ყაველაშვილი, აზერბაიჯანის პრეზიდენტი ილჰამ ალიევი, თურქმენეთის პრეზიდენტი გურბანგული ბერდიმუჰამედოვი, სომხეთის პრემიერმინისტრი ნიკოლ ფაშინიანი, პაკისტანის პრემიერმინისტრი და კატარის ემირი.

მათი ცნობით, აზერბაიჯანის პრეზიდენტი ერთ-ერთი პირველი ლიდერი იყო, რომელმაც დასწრების განზრახვის შესახებ განაცხადა. გამოცემა წერს, რომ თეირანში მაღალი დონის დელეგაციის ხელმძღვანელობით ჩავა თურქმენეთის პრეზიდენტი გურბანგული ბერდიმუჰამედოვი; ირანში გაემგზავრება ასევე სომხეთის პრემიერმინისტრი ნიკოლ ფაშინიანი; დაკრძალვას დაესწრება კატარის ემირიც, თუმცა დელეგაციას კატარის პრემიერმინისტრი უხელმძღვანელებს; სამხრეთ აზიაში, პაკისტანის პრემიერმინისტრი ირანში პარასკევს, 3 ივლისს, მაღალი რანგის დელეგაციასთან ერთად ჩავა.

ოფიციალური გრაფიკის თანახმად, ცერემონია 4 ივლისს, დილის 6:00 საათზე, თეირანის იმამ ხომეინის მოსალაში დაიწყება და 5 ივლისის საღამოს 8:00 საათამდე გაგრძელდება. დაკრძალვის ლოცვა 5 ივლისის დილით გაიმართება. თეირანში, ყუმსა და ერაყში გამართული ცერემონიების შემდეგ, გარდაცვლილ ლიდერს ხუთშაბათს, 9 ივლისს, მაშჰადში დაკრძალავენ.