ბრიტანელმა სკოლის მოსწავლემ ალექსანდრ ბროუდერმა გამოავლინა კრიპტო პლატფორმების მთელი ქსელი, რომელსაც რუსეთი სანქციებისგან თავის დასაღწევად იყენებდა. ამის შესახებ "ნოვაია გაზეტა ევროპა" წერს. მათ შორისაა ის სამი კომპანია, რომლებიც საქართველოშია რეგისტრირებული და რომლებიც დიდი ბრიტანეთის მიერ სანქცირებულ კომპანიებს შორის მოხვდნენ. ამის შესახებ ინფორმაცია დიდი ბრიტანეთის მთავრობამ 26 მაისს გაავრცელა.

ბრიტანეთის მთავრობის ვებგვერდზე განთავსებული დოკუმენტის თანახმად, სანქციები დაუწესდათ შემდეგ ქართულ იურიდიულ პირებს: Arvix LLC-ს (შპს არვიქს), Rapira Group LLC-სა (შპს რაპირა გრუპ) და Aifory LLC-ს (შპს ეიაიფორი).

გამოცემა წერს, რომ უახლოეს დღეებში ევროკავშირი გეგმავს, რომ ქართული კრიპტოვალუტის პლატფორმები რუსეთის წინააღმდეგ სანქციების 21-ე რაუნდში ჩართოს. ამის შესახებ Financial Times იტყობინება, რომლის თანახმადაც, ევროპაში საქართველოში რეგისტრირებული რამდენიმე კრიპტო კომპანია ეჭვმიტანილია მოსკოვის სანქციების გვერდის ავლის ხელშეწყობაში.

მანამდე, მაისის ბოლოს, ბრიტანეთის მთავრობამ სანქციები დაუწესა რუსულ გადახდის ქსელ A7-თან დაკავშირებულ კრიპტო პლატფორმებს, რომლებიც, საგარეო საქმეთა სამინისტროს ცნობით, რუსეთის სამხედრო ეკონომიკის მხარდასაჭერად გამოიყენებოდა.

მხოლოდ გასულ წელს ამ ქსელის მეშვეობით 90 მილიარდ დოლარზე მეტი დაიხარჯა — თანხა, რაც რუსეთის წლიური სამხედრო ხარჯების ნახევარს უტოლდება.

ლონდონმა სანქციები დააწესა 18 პლატფორმის წინააღმდეგ — კრიპტოვალუტის პლატფორმების, ბანკებისა და ფინანსური ქსელების წინააღმდეგ რუსეთში, გაერთიანებულ სამეფოში, საქართველოში, ყირგიზეთში, არაბთა გაერთიანებულ საემიროებში, პანამასა და ელ სალვადორში, რომლებიც, ბრიტანეთის საგარეო საქმეთა სამინისტროს განცხადების თანახმად, გამოიყენებოდა, როგორც "ჩრდილოვანი ფინანსური სისტემები" ანტირუსული სანქციების გვერდის ასავლელად. ამ კომპანიების აქტივები გაყინულია და ბრიტანულმა ორგანიზაციებმა შეწყვიტეს მათთან საქმიანი ურთიერთობა.

როგორც უკვე ვახსენეთ, სანქციების სიაში ასევე შედის სამი ქართული კრიპტო ბირჟა: Arvix LLC, Rapira Group LLC და Aifory LLC.

"ჩვენ ასევე ვიღებთ ზომებს სამი ქართული კომპანიის წინააღმდეგ, რომლებიც რუსეთზე ორიენტირებულ საფონდო ბირჟებს მართავენ და ცდილობენ სანქციების გვერდის ავლას", — ნათქვამია ბრიტანეთის მთავრობის განცხადებაში.

ვინ არის ალექსანდრ ბროუდერი?

17 წლის ბრიტანელი სკოლის მოსწავლე ალექსანდრ ბროუდერი, რომელმაც რუსული ჩრდილოვანი ქსელის იდენტიფიცირება შეძლო, ცნობილი ბრიტანელი ფინანსისტის უილიამ ბროუდერის ვაჟია, რომელიც 2012 წელს შეერთებულ შტატებში მიღებული "მაგნიცკის აქტის" მთავარი არქიტექტორია და რომელიც ადამიანის უფლებების დარღვევაში მონაწილე მაღალი თანამდებობის პირებისთვის ვიზების და ფინანსური შეზღუდვებს აწესებს.

მარტში ალექსანდრ ბროუდერმა გამოაქვეყნა ანგარიში ჰენრი ჯექსონის საზოგადოებისთვის, რომელშიც აღწერილი იყო კრიპტოვალუტაზე დაფუძნებული უკანონო სახსრების გადარიცხვის სქემები და ხაზგასმული იყო, რომ რუბლით მხარდაჭერილი სტაბილური კრიპტოვალუტა, რომელიც ცნობილია როგორც A7A5, წარმოადგენს "დასავლეთის წინაშე მდგარ ერთ-ერთ ყველაზე სერიოზულ გამოწვევას" სანქციების ქვეშ ფულის გათეთრების წინააღმდეგ ბრძოლაში. ბროუდერის თქმით, რამდენიმე ქვეყანამ, მათ შორის რუსეთმა, ირანმა და ჩრდილოეთ კორეამ, ამ გზით დაახლოებით 350 მილიარდი დოლარი გაათეთრეს.

რუსეთის პასუხი

როდესაც გაირკვა, რომ ბრიტანეთის მთავრობა ბროუდერთან კონსულტაციებს ატარებდა, რუსეთის საგარეო საქმეთა სამინისტრომ საპასუხო ზომები მიიღო: 2 ივნისს მოსკოვმა ალექსანდრ ბროუდერისა და კიდევ ოთხი ბრიტანეთის მოქალაქისთვის რუსეთში შესვლის აკრძალვა გამოაცხადა "ცილისმწამებლური სპეკულაციებისა და ცრუ ინფორმაციის" გამო.

"ბრიტანული პოლიტიკური ელიტის მიერ რუსოფობიის წაქეზების, ჩვენი ქვეყნის საერთაშორისო იმიჯის განზრახ შელახვისა და ანტირუსული სანქციების გამკაცრების ნებისმიერ მცდელობას გადამწყვეტი საპასუხო ზომები მოჰყვება", — განაცხადა რუსეთის საგარეო საქმეთა სამინისტრომ.

თუმცა, ბრიტანელმა სკოლის მოსწავლემ სოციალურ ქსელ X-ში თავის პოსტებში ნათლად განაცხადა, რომ რუსეთში ვიზიტის აკრძალვა მას საერთოდ არ აწუხებს:

"მე ვამაყობ, რომ მსოფლიოში პირველი სკოლის მოსწავლე ვარ, რომელსაც ავტორიტარული რეჟიმი კორუფციის გამოაშკარავებისთვის სანქციები დაუწესა. /.../ მე აღმოვაჩინე მათი აქილევსის ქუსლი. A7A5-ის გარეშე ისინი ვერ შეძლებდნენ თავიანთი აგრესიული ომის დაფინანსებას", — წერს ბროუდერი.