"ტვ პირველის" საინფორმაციო სამსახურის უფროსის, ნოდარ მელაძის ინფორმაციით, ტელევიზიის სამ ჟურნალისტს პარლამენტის აკრედიტაცია 1 წლამდე ვადით შეუჩერდა.

მელაძის განცხადებით, გადაწყვეტილება სრულიად დაუსაბუთებელი მოტივით არის მიღებული და ეს კრიტიკული მედიის შეზღუდვას ემსახურება.

"ბოლო სამ კვირაში შაბათის ეთერის სამ ჟურნალისტს მაკა ჩიხლაძეს, მაკა ანდრონიკაშვილსა და ნატალი ქაჯაიას საქართველოს პარლამენტის აკრედიტაცია 1, 6 და 12 თვით შეუჩერეს, სრულიად დაუსაბუთებელი მოტივით!

როდესაც კითხვებზე პასუხის გაცემა არ უნდათ, მარტივი გამოსავალი ჟურნალისტების დაბლოკვაა.

წერილებში, რომლებიც გამომძიებელმა ჟურნალისტებმა მიიღეს, არ არის დაკონკრეტებული, რომელი რესპონდენტის ინტერვიუს გამო მოხდა ამ ბლანკეტური ნორმის გამოყენება.

სრულიად ბუნდოვანი პასუხები ჩვენთვის ცხადს ხდის ამ აკრძალვის განზრახვას — მათი მიზანია, შეწყდეს კრიტიკული კითხვები.

კომუნიკაციების კომისია ტელევიზიას საპასუხო კომენტარის არარსებობის გამო ედავება. სამი შეჩერებული აკრედიტაციის ფონზე, სად უნდა ჩაწეროს ჟურნალისტმა პასუხი?

პასუხს ითხოვ და აკრედიტაციას გიჩერებენ; პასუხი არ არის და მარეგულირებელი გაჯარიმებს", — წერს "ტვ პირველის" საინფორმაციო სამსახურის უფროსი ნოდარ მელაძე.

პარლამენტის აკრედიტაცია არ გასცეს "პუბლიკის" ჟურნალისტ მინდია გაბაძეზეც. 26 ივნისს ცნობილი გახდა, რომ პარლამენტის თავმჯდომარის სახელზე 16 ივნისს გაგზავნილი აკრედიტაციის მოთხოვნა არ დაკმაყოფილდა.

შალვა პაპუაშვილმა პარლამენტის აკრედიტაციის წესების გამკაცრება 14 მაისს დააანონსა, მას შემდეგ, რაც ევროპარლამენტმა პროსამთავრობო ტელეკომპანია "იმედს" აკრედიტაცია 1 წლით შეუჩერა.

ცვლილებების თანახმად, საქართველოს პარლამენტში აკრედიტაციის წესების დარღვევის შემთხვევაში, პირველად აკრედიტაცია 1 თვით შეჩერდება, განმეორების შემთხვევაში კი ვადა 1 წლამდე გაიზრდება. აქამდე საქართველოს პარლამენტში აკრედიტაციის წესების დარღვევის შემთხვევაში სანქცია მხოლოდ ჟურნალისტის მიმართ გამოიყენებოდა, ახალი წესით კი სანქცია მედიასაშუალების მიმართაც იქნება შესაძლებელი.

როგორც შალვა პაპუაშვილმა 8 ივნისს განაცხადა, "დარღვევის სიმძიმისა და სიხშირის გათვალისწინებით, შესაძლებელი იქნება, მთლიანად მედიას გაუუქმდეს აკრედიტაცია 1 წლამდე ვადით."