გუშინ, 29 ივნისს, მოკლული მასწავლებლის, გიგა ავალიანის დედა ეკა კუპატაძე, ადვოკატ ზაზა ხატიაშვილთან ერთად, ბიძინა ივანიშვილის სახლთან მივიდა, საიდანაც ვიდეომიმართვა გაავრცელა და ბიძინა ივანიშვილის ცოლს, ეკატერინე ივანიშვილს მხარდაჭერისთვის მიმართა.

30 ივნისს ეკატერინე ივანიშვილი მოკლული მასწავლებლის დედას წერილობით გამოეხმაურა. ხვედელიძის განცხადებაში ვკითხულობთ, რომ ეკა კუპატაძეს "როგორც დედა-დედას, როგორც ქალი-ქალს, სულიერ სიმტკიცეს, ძალას და სიმშვიდეს" უსურვებს და დასძენს, რომ ჯერ გამოძიება არ დასრულებულა და დარწმუნებულია "შესაბამისი სახელმწიფო უწყებები საქმეს სრულყოფილად გამოიძიებენ".

"ქალბატონო ეკა, მთელი გულით თანაგიგრძნობთ და ვიზიარებ თქვენს უმძიმეს ტრაგედიას. ვიცი, რომ არ არსებობს სიტყვა, რომელიც დედას შვილის დაკარგვის ტკივილს შეუმსუბუქებს, თუმცა მინდა იცოდეთ, რომ ამ მწუხარებაში მარტო არ ხართ და ამ ქვეყანაში მცხოვრები ყველა ქართველი დედა თქვენი ჭირისუფალია. რაც შეეხება ჩემდამი თქვენს მოწოდებას, როგორც ჩემთვის ცნობილია, გამოძიება ჯერ არ დასრულებულა. დარწმუნებული ვარ, შესაბამისი სახელმწიფო უწყებები საქმეს სრულყოფილად გამოიძიებენ და ყველა გარემოება სრულად იქნება შესწავლილი, რათა თქვენს თავს დატრიალებული უმძიმესი ტრაგედიის არცერთი კითხვა არ დარჩეს პასუხგაუცემელი. როგორც დედა-დედას, როგორც ქალი-ქალს, გისურვებთ სულიერ სიმტკიცეს, ძალას და სიმშვიდეს," — ნათქვამია განცხადებაში.

ეკა კუპატაძის გავრცელებულ ვიდეო მიმართვაში საქმის ადვოკატი ზაზა ხატიაშვილი ამბობს, რომ მისი დაცვის ქვეშ მყოფი "ითხოვს პროკურატურისგან პასუხს, რატომ არ აძლევენ დაზარალებულის სტატუსს, პროკურატირის უკანონო მოქმედებების გამო მიყენებული სულიერი ტანჯვის გამო".

"ქალბატონო ეკატერინე ხვედელიძე, მე ვიცი, რომ თქვენ ბრძანდებით მოსიყვარულე დედა. ამიტომ მე დღეს ბატონი ბიძინა ივანიშვილის სახლთან კი არა, მისი შვილების დედის სახლთან მოვედი. 4 შვილის გამზრდელი დედის სახლთან მოვედი, სადისტურად შვილმოკლული დედა. ღმერთმა თქვენ ის სიმწარე არ გამოგაცდევინოთ, რაც მე გავიარე. გონებით უნდა გამომყვეთ და მიხვდეთ, რა სიგიჟეში ვარ მე დღეს, რამ მომიყვანა მე დღეს აქ. თქვენ უნდა გადადგათ ისტორიული ნაბიჯი და ამომიდგეთ გვერდით, როგორც დედა გამწარებულ დედას. ველოდები თქვენგან უკუკავშირს. მე მინდა გითხრათ, რომ არ არსებობს ძალა, რომელიც მე ოდნავ მაინც შემატორტმანებს და უკან დამახევინებს, იმიტომ, რომ უკან არის ჩემი შვილის საფლავი და მე იმას არ გადავაბიჯებ. გთხოვთ, დამიდექით გვერდით.
ეს არის ბოლო რამდენიმე ათწლეულის განმავლობაში ყველაზე მეტად რეზონანსული საქმე საქართველოში, როგორც არასდროს ისე არის საზოგადოება ერთსულოვანი, გონება მოჭიმული, აკვირდება ყველაფერს გამადიდებელი შუშით და ახლა პატარა შეცდომაც კი სახელმწიფოს ღირსებაზე არ იმოქმედებს კარგად. მე ველოდები თქვენგან უკუკავშირს და დარწმუნებული ვარ ეს იქნება სამართლიანი და კეთილგონივრული. მე იმედი მაქვს თქვენი მხარდაჭერის ქალბატონო ეკატერინე ხვედელიძე," — განაცხადა ეკა კუპატაძემ.