საპარლამენტო უმცირესობა - ევროპული საქართველოს წევრი სერგი კაპანაძე მინისტრებს აკრიტიკებს და აცხადებს, რომ თეა წულუკიანი, გიორგი მღებრიშვილი, კახა კალაძე და დიმიტრი ქუმსიშვილი თანამდებობებიდან უნდა გათავისუფლდნენ.

"იშვიათად არის ხოლმე, რომ ერთი თვის განმავლობაში ოთხი მინისტრი იყოს ისე უსიტყვოდ მოსახსნელი, როგორც ახლაა საქართველოში" - წერს კაპანაძე ფეისბუკზე.

მისი თქმით, უნდა გათავისუფლდეს იუსტიციის მინისტრი თეა წულუკიანი, რადგან სტრასბურგის სასამართლომ საქართველოდან გაგზავნილი მოსამართლეების სია არ დაამტკიცა.

კაპანაძე აკრიტიკებს შს მინისტრს გიორგი მღებრიშვილსაც, ქართველი ჯარისკაცი გია ცერცვაძისა და საქართველოს ანტიტერორისტული ცენტრის ყოფილი უფროსის, ზურაბ მაისურაძის საქმეებისთვის და ასევე კრიმინალური სტატისტიკისთვის, რომელიც კაპანაძის თქმით, გაყალბებულია.

საპარლამენტო უმცირესობის წევრი ასევე მიიჩნევს, რომ გაზპრომთან დადებული შეთანხმებისთვის უნდა მოიხსნას ენერგეტიკის მინისტრი კახა კალაძე.

სერგი კაპანაძე "დედოლარიზაციის უაზრო და მავნებლური პაკეტისთვის" ეკონომიკის მინისტრის, დიმიტრი ქუმსიშვილის, თანამდებობიდან მოხსნასაც ითხოვს.