ლიტვის გენერალურმა პროკურატურამ რუსეთის ხელისუფლებას უარი უთხრა საქართველოს ანტიტერორისტული ცენტრის ყოფილი უფროსის, ზურაბ მაისურაძის გადაცემაზე. ოფიციალური ინფორმაციის მიხედვით, ზურაბ მაისურაძეს ინტერპოლი რუსეთის მოთხოვნით ეძებდა. ლიტველმა სამართალდამცავებმა მაისურაძე 2016 წლის დეკემბრის დასაწყისში იმ დროს დააკავეს, როცა ის ვილნიუსში კიევიდან ჩაფრინდა.

პროკურატურის გადაწყვეტილება მაისურაძის რუსეთისთვის არგადაცემის შესახებ, სასამართლომაც უნდა დაამტკიცოს.

მაისურაძე ამ დროისათვის გირაოს საფუძველზეა გაშვებული და მას ვალდებულება აქვს აღებული, რომ რეგულარულად გამოცხადდეს ლიტველ სამართალდამცავებთან, სანამ სასამართლო არ მიიღებს გადაწყვეტილებას.

რუსეთის ხელისუფლება მაისურაძეს ტერორიზმთან კავშირში ადანაშაულებს. ის 2012 წელს, სააკაშვილის ხელისუფლების დროს, საქართველოს ანტიტერორისტულ ცენტრს ხელმძღვანელობდა. მაისურაძე სააკაშვილის თანაგუნდელად მიიჩნევა.