დიეგო მარადონამ ერთხანს კათოლიკური ეკლესიისგან თავი შორს დაიჭირა, მას შემდეგ, რაც პაპმა იოანე პავლე II-მ იმედი გაუცრუა. ლეგენდარული ფეხბურთელი კათოლიკური ეკლესიის იმჟამინდელ მეთაურს 2000 წელს შეხვდა და როგორც გამოცემები იუწყებიან, გაანაწყენა იმ ფაქტმა, რომ პაპისგან განსაკუთრებული კრიალოსანი საჩუქრად არ მიუღია.

მოგვიანებით, იგი მედიაგამოცემებს უყვებოდა, რომ ვატიკანში სტუმრობისას ოქროს ჭერის დანახვამ ზიზღი მოჰგვარა. იგი პაპს ურჩევდა, ღარიბთა დასახმარებლად ძვირფასი ლითონისგან დამზადებული ჭერი გაეყიდა.

"ვატიკანში ვიყავი და ოქროს ჭერი ვნახე, შემდეგ კი გავიგე, როგორ ამბობდა პაპი, რომ ეკლესიის საზრუნავი ღარიბი ბავშვების დახმარება იყო. მერე? გაყიდეთ ჭერი, მეგობარო", — განუცხადა მარადონამ The Independent-ს 2005 წელს.

კლუბ ბოკა ხუნიორსის ყოფილმა ვარსკვლავმა თქვა, "როგორ შეუძლია ვიღაც თახსირს ოქროს ჭერქვეშ იცხოვროს, შემდეგ კი ღარიბ ქვეყნებში წავიდეს და ამოვსებული სტომაქით ბავშვებს აკოცოს, რწმენა დავკარგე".

2014 წელს მარადონა კრიტიკის ქარცეცხლში გაეხვა პაპისთვის "ნაბოზარის" წოდების გამო, ბუენოსაირესელმა ეპისკოპოსმა კი მისი ქცევა ნარკოტიკების მოხმარებას მიაწერა.

იმავე ეთერში, სადაც ფეხბურთელმა პაპი გალანძღა, იგი ასევე შეეხო კრიალოსნის შემთხვევას. მისი თქმით, პაპმა მის ცოლსა და დედას კრიალოსნები აჩუქა, მას კი "გამორჩეული" კრიალოსანი ერგო. რადგან მარადონამ დანარჩენ ორ კრიალოსანსა და თავის ნივთს შორის განსხვავება ვერ დაინახა, სასულიერო პირს ახსნა სთხოვა.

"იმ ნაბოზარს ჩემი მოკვლა უნდოდა", — განაცხადა მარადონამ ეთერში, — "მერე მითხრა, ნაკურთხიაო".

მიუხედავად კათოლიკურ ეკლესიასთან დაძაბული ურთიერთობისა, მისი დამოკიდებულება შეიცვალა მას შემდეგ, რაც პაპი არგენტინელი ფრანცისკე გახდა. ამის შემდეგ, მარადონამ მონაწილეობა მიიღო ვატიკანის ორგანიზებულ საქველმოქმედო მატჩშიც.

"როცა მითხრეს, რომ ბავშვების დასახმარებლად უნდა გვეთამაშა, ვიცოდი, რომ ამ მატჩს არ გამოვტოვებდი", — განაცხადა მარადონამ იმხანად, — "ფრანცისკეს შეუძლია, დარწმუნებული იყოს, რომ მარადონა 90 წუთის განმავლობაში მოედანზე იქნება. ეკლესიის და ჩემი გზები გაიყარა, თუმცა ფრანცისკემ რწმენა დამიბრუნა".

არგენტინელი ფეხბურთელი საკუთარ თავს "უტყვთა ხმას" უწოდებდა და საკუთარი თავი ხალხის "წარმომადგენლად" მიაჩნდა. ჟურნალისტ პოლ ნიუმენის თქმით, მარადონა ხელგაშლილობით გამოირჩეოდა და ხშირად გასცემდა ფულს გარშემომყოფებზე.

დიეგო მარადონა 25 ნოემბერს, 60 წლის ასაკში გარდაიცვალა. გავრცელებული ცნობით, დაღუპვის მიზეზი გულის შეტევა გახდა. ფეხბურთის ლეგენდის სიკვდილის გამო, არგენტინის პრეზიდენტმა, ალბერტო ფერნანდესმა, ქვეყანაში სამდღიანი გლოვა გამოაცხადა. მარადონას გამოემშვიდობნენ ცნობილი ფეხბურთელებიც.