გინესის მსოფლიო რეკორდების საზოგადოებამ მსოფლიოში ყველაზე დიდი და ყველაზე პატარა ძაღლები ერთმანეთს გააცნო — ჩიხუახუა პერლი და გერმანული დოგი, რეგი.

როდესაც ორივე ძაღლი გვერდიგვერდ დადის, პერლი — ჩიხუახუა, რომლის სიმაღლე მხოლოდ 9.14 სანტიმეტრია, ძლივს სწვდება რეგის თათის ზედა ნაწილს. რეგის სიმაღლე 1.007 მეტრია და პერლს სიმაღლით კომიკურად აღემატება. მათ შორის იმხელა განსხვავებაა, რომ შესაძლოა დაგვავიწყდეს, ორივე ერთი და იგივე სახეობას რომ მიეკუთვნება.

"პერლი მსოფლიოში ყველაზე დაბალი ცოცხალი ძაღლია, რეგი კი — ყველაზე მაღალი. თუმცა, მიუხედავად მათ შორის არსებული 91.56 სანტიმეტრიანი სხვაობისა, ისინი პირველი შეხვედრაზევე დამეგობრდნენ და ბედნიერად და მხიარულად თამაშობდნენ ერთად," — იუწყება გინესის მსოფლიო რეკორდების საზოგადოება (GWR).

პერლი და მისი მფლობელი, ვანესა სემლერი, ფლორიდიდან აიდაჰოში გაემგზავრნენ, რათა რეგი და მისი მფლობელი, სემ ჯონსონ რისი, გაეცნოთ. როდესაც ძაღლები პირველად შეხვდნენ ერთმანეთს, პერლი ჯერ კიდევ მფლობელის ხელში იყო მოკალათებული, რეგი კი მას ნაზად მიეფერა და დაყნოსა. პირველი კონტაქტი ასე შედგა, შემდეგ კი ძაღლები გვერდიგვერდ დაწვნენ სავარძელზე.

ერთმანეთთან შეგუების შემდეგ ორივემ დაიწყო სახლისა და ეზოს გარშემო ერთად ხეტიალი და ფოტოებისთვის პოზირებაც — რეგი იმდენად მაღალია, რომ სამზარეულოს ქვედა კარადებს სწვდება, პერლი კი იმდენად პატარაა, რომ რეგის საკვების ჯამშიც კი თავისუფლად ეტევა.

ჯონსონ რისმა წინასწარ ივარაუდა, რომ რეგი პერლს ნაზად მოეპყრობოდა: "ის ძალიან ფრთხილია და კარგად გრძნობს, რას აკეთებს."

"ვვარაუდობდი, რომ კარგად მიიღებდა პერლს, და ალბათ უფრო პერლის პატრონი დააინტერესებდა, ვიდრე თავად პერლი," — დაამატა მან, GWR-ის თანახმად.