2026 წლის დასაწყისში საქართველოს როკჯგუფ Rammstein-ის ვოკალისტი ტილ ლინდემანი ეწვევა. თავისი ახალი სოლო ტურნეს, Meine Welt ("ჩემი სამყარო"), ფარგლებში, გერმანელი მუსიკოსი ქართველ მსმენელს "შეულამაზებელ და სრულიად სხვაგვარად წარმოდგენილ" შოუს ჰპირდება.

ლინდემანის კონცერტი 11 იანვარს, თბილისის სპორტის სასახლეში გაიმართება. ღონისძიებაზე დასასწრები ბილეთების გაყიდვა 6 ივნისს დაიწყო. მსურველებს ბილეთის შეძენა biletebi.ge-ის ვებგვერდზე შეუძლიათ.

რაც შეეხება ფასებს, ბილეთების საფასური 150 ლარიდან იწყება და 500 ლარამდე მერყეობს; ფანზონაში ბილეთი 300 ლარი ღირს, VIP სექტორში კი — 500 ლარი.

ფოტო: Jens Koch

ტურნეს ფარგლებში, ლინდემანს 17 ქვეყანაში 25-ზე მეტი გამოსვლა აქვს დაგეგმილი. თბილისში, ალმათიში (ყაზახეთი) და ტაშკენტში (უზკებეთი) კონცერტების ორგანიზატორი რუსეთში დაფუძნებული სააგენტო Park Live World არის.

62 წლის ტილ ლინდემანი მეტალის ყველა დროის ერთ-ერთ საუკეთესო სოლისტად მიიჩნევა. ინდუსტრიული მეტალ-ბენდი Rammstein კი, რომლის ფრონტმენიც ლინდემანია, შექმნიდან 30 წელზე მეტი ხნის შემდეგაც საკულტოდ რჩება. ჯგუფმა მსოფლიოში 25 მილიონზე მეტი ჩანაწერი გაყიდა, მათ ხუთ ალბომს კი პლატინის სტატუსი აქვს მიღებული.

Rammstein-ის გარდა, ლინდემანს თავისივე სახელობის სოლოპროექტი Lindemann აქვს. მუსიკოსი რამდენიმე ფილმშიც გამოჩენილა და გამოცემული აქვს სამი პოეტური კრებული.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...