საქართველოს მთავარმა პროკურატურამ მოსამართლეთა საკვალიფიკაციო გამოცდების ტესტების სავარაუდო გაჟონვასთან დაკავშირებით გამოძიება დაიწყო.

პროკურატურის პრესსამსახურის ცნობით, საგამოძიებო ორგანომ იუსტიციის უმაღლესი საბჭოდან გადმოგზავნილი მასალები მიიღო, რომლის საფუძველზეც სისხლის სამართლის კოდექსის 332-ე მუხლის პირველი ნაწილით დაიწყო გამოძიება. აღნიშნული მუხლი გულისხმობს ცალკეულ საჯარო მოხელეთა მიერ სამსახურებრივი უფლებამოსილების ბოროტად გამოყენებას.

იუსტიციის უმაღლესი საბჭოს მიერ პროკურატურაში გადაგზავნილი დასკვნა შეეხება 2015 წლის 21-28 ნოემბერს ჩატარებული მოსამართლეობის საკვალიფიკაციო გამოცდებისთვის განკუთვნილი საგამოცდო ტესტებისა და კაზუსების კონფიდენციალურობის სავარაუდო დარღვევის ფაქტს.

თბილისის საქალაქო სასამართლოს თავმჯდომარე მამუკა ახვლედიანმა რამდენიმე დღის წინ საჯაროდ განაცხადა, რომ მოსამართლეობის ზოგიერთ კანდიდატს უკანონოდ მიუწვდებოდა ხელი გამოცდის პასუხებისთვის. იუსტიციის უმაღლესმა საბჭომ დაადასტურა, რომ სავარაუდო დარღვევაზე შიდა მოკვლევას აწარმოებდნენ, თუმცა, მამუკა ახვლედიანი გააკრიტიკეს ინფორმაციის ნაადრევად გასაჯაროებისთვის.

იუსტიციის უმაღლეს საბჭოსა და მამუკა ახვლედიანს შორის დაპირისპირება 2015 წელს დაიწყო. 2015 წლის დეკემბერში მამუკა ახვლედიანმა იუსტიციის უმაღლესს საბჭოსა და უზენაესი სასამართლოს თავმჯდომარე ნინო გვენეტაძეზე თქვა, რომ ისინი საკუთარ მოვალეობას თავს ვერ ართმევდნენ. მოგვიანებით, მან ასევე საჯაროდ განაცხადა, რომ მოსამართლეთა საკვალიფიკაციო გამოცდის ტესტებმა გაჟონა. 2016 წლის თებერვალში იუსტიციის უმაღლესმა საბჭომ მამუკა ახვლედიანის დისციპლინარული დევნა დაიწყო ნინო გვენეტაძის განცხადების საფუძველზე, თუმცა, მათ განმარტეს, რომ ამას კავშირი არ ჰქონდა ახვლედიანის მიერ სასამართლო სისტემაში არსებულ პრობლემებზე გაკეთებულ საჯარო განცხადებებთან. საბოლოოდ, მამუკა ახვლედიანი თბილისის საქალაქო სასამართლოს თავმჯდომარის პოსტიდან 22 თებერვალს გადააყენეს. აღნიშნული გადაწყვეტილება ახვლედიანმა შურისძიებად შეაფასა.