თბილისის საქალაქო სასამართლომ რამდენიმე წუთის წინ გამოაცხადა გადაწყვეტილება თეთრი ხმაურის მოძრაობის აქტივისტების, მირიან მალაყმაძისა და შოთა ხინჩას საქმეზე.

სასამართლოს გადაწყვეტილებით, ხინჩას არ ჩაუდენია პოლიციის მიმართ "ბოროტი დაუმორჩილებლობა, შესაბამისად, ის გამართლდა, რაც შეეხება მირიან მალაყმაძეს, სასამართლომ ის სამართალდამრღვევად სცნო და დააკისრა ჯარიმა - 250 ლარის ოდენობით. მალაყმაძემ აღნიშნული ჯარიმა 1 კვირაში უნდა გადაიხადოს.

სამართალდამცავები აქტივისტებს 2016 წლის 10 დეკემბრის აქციაზე ადმინისტრაციულ სამართალდარღვევათა კოდექსის 173-ე მუხლის დარღვევას ედავებოდნენ, რაც პოლიციელისადმი ბოროტ დაუმორჩილებლობას გულისხმობს. მოგვიანებით, 27 დეკემბერს, მათ კი კიდევ ერთი მუხლი, შეკრებისა და მანიფესტაციის წესის დარღვევა დაემატა, თუმცა, დღეს მხოლოდ 173-ე მუხლთან დაკავშირებული გადაწყვეტილება გახდა ცნობილი.

პოლიციელები სასამართლო განხილვისას ამბობდნენ, რომ 10 დეკემბრის აქცია ნარკოტიკების მოხმარების დეკრიმინალიზაციის მოთხოვნით, მერიის შესაბამისი სამსახურების მხრიდან სანქცირებული არ იყო და აქტივისტები მათ მოთხოვნას "ბოროტად არ დაემორჩილნენ" და გზა მაინც გადაკეტეს. ადვოკატებმა სასამართლოზე მათ პასუხად თქვეს, რომ აქციაზე ბევრი ხალხი იყო, რამაც ბუნებრივად გამოიწვია მოძრაობის შეფერხება და ეს არ ყოფილა დაუმორჩილებლობა.

მალაყმაძისა და ხინჩას ინტერესებს სასამართლოში ადამიანის უფლებათა სწავლებისა და მონიტორინგის ცენტრი (EMC) იცავდა. როგორც ორგანიზაციის წარმომადგენელმა, ანა ნასრაშვილმა სასამართლო პროცესის შემდეგ განაცხადა, ისინი მალაყმაძის მიმართ გამოტანილ გადაწყვეტილებას ზემდგომ ინსტანციაში გაასაჩივრებენ.