არასამთავრობო ორგანიზაციები ე.წ. კაბელების საქმეზე 16 მაისს გამოტანილ განაჩენს ეხმაურებიან და განმარტავენ, თუ რა ქმნის იმის განცდას, რომ საქმეზე გამოტანილი განაჩენი მიკერძოებული და პოლიტიზირებულია. NGO-ები ამბობენ, რომ განაჩენთან დაკავშირებულ ეჭვებს ამყარებს ის ფაქტი, რომ ბრალის წარდგენას წინ უსწრებდა მაშინდელი თავდაცვის მინისტრის, ირაკლი ალასანიასა და ყოფილი პრემიერ მინისტრის, ბიძინა ივანიშვილის ღია დაპირისპირებაც, რასაც შედეგად ალასანიას გადადგომა მოჰყვა:

"განსაკუთრებით საყურადღებო იყო ივანიშვილის ინფორმირებულობა საქმის დეტალების შესახებ მაშინ, როდესაც საქმის ნაწილს იმ მომენტისთვის გრიფი საიდუმლო ედო. საზოგადოებისთვის გაურკვეველი დარჩა, რატომ და რა გზებით ფლობდნენ ინფორმაციას საქმის დეტალების შესახებ პირები, რომლებიც გამოძიებაში არ იყვნენ ჩართულები და საქმის მასალებზე წვდომა არ უნდა ჰქონოდათ".

ამასთან, არასამთავრობოების განმარტებით, ის თანხა, რომლის გაფლანგვასაც თავდაცვის სამინისტროს ყოფილ მაღალჩინოსნებს პროკურატურა ედავება, ამ პირების სამსახურებრივი სტატუსიდან გამომდინარე, მათ უშუალო მფლობელობასა და გამგებლობაში ვერ იქნებოდა:

"მსჯავრდებულების თანამდებობების მიხედვით ისინი ასევე მოკლებული იქნებოდნენ შესაძლებლობას საბოლოო გადაწყვეტილება დამოუკიდებლად მიეღოთ. ამდენად გაურკვეველია, რა საფუძვლით გამორიცხა ამ საქმეში პროკურატურამ თავდაცვის სამინისტროს მაშინდელი მაღალი თანამდებობის პირების შესაძლო ჩართულობა და რატომ არ დაუსვა არც ერთი შეკითხვა ყოფილ თავდაცვის მინისტრს".

არასამთავრობოები განმარტავენ, რომ ე.წ. კაბელების პროექტი მთავრობამ განიხილა და დაამტკიცა, თანხა კი ფინანსთა სამინისტროს მეშვეობით გადაირიცხა, რაც კიდევ ერთხელ მიუთითებს ამ საქმეში მსჯავრდებული პირების ჩართულობის ხასიათსა და ხარისხზე, ასუსტებს რა პროკურატურის არგუმენტაციას:

"წარდგენილი ბრალი სათანადო ხარისხითა და დამაჯერებლობით ვერ ასაბუთებს მსაჯვრდებულების ანგარებით მოტივებს და განზრახვებს, რაც ამ ტიპის დანაშაულის ბრალად შერაცხვისთვის აუცილებელ წინაპირობას წარმოადგენს. ნიშანდობლივია ის გარემოებაც, რომ მოსამართლემ 18 თვიანი განხილვის შემდეგ მხოლოდ 2 არასამუშაო დღეში მიიღო გადაწყვეტილება".

ორგანიზაციები ასკვნიან, რომ ყოველივე ზემოაღნიშნული, მსჯავრდებულების დაკავების წინაპირობები და საქმის განვითარების დროს არსებული კონტექსტი, საქმის განხილვის პერიოდში გამოვლენილ ცალკეულ ხარვეზებთან ერთად ერთობლიობაში ქმნის განცდას, განცდას, რომ აღნიშნულ საქმეში მართლმსაჯულება მიკერძოებულად და შესაძლო პოლიტიკური გავლენებით განხორციელდა.

გავრცელებულ განცხადებას ხელს აწერენ: TI, EMC, IDFI, PHR, ISFED, GDI, კონსტიტუციის 42-ე მუხლი და დამოუკიდებელ ექსპერტთა კლუბი.

ე.წ. კაბელების საქმეზე თავდაცვის სამინისტროს ყოფილი თანამშრომლები სასამართლომ დამნაშავედ 16 მაიის ცნო და სასჯელად 7 წლით თავისუფლების აღკვეთა მიუსაჯა.