თავისუფალი დემოკრატებმა დღეს, 16 მაისს, ე.წ. კაბელების საქმეზე გამოტანილ განაჩენთან დაკავშირებით საგანგებო ბრიფინგი გამართეს და განმარტეს, რომ საქმეში მონაწილე 5 პირის მიმართ გამოტანილი გამამტყუნებელი განაჩენის გასაპროტესტებლად შაბათს, 14 საათზე, საპროტესტო აქციას პროკურატურასთან გამართავენ.

პარტიის თავჯდომარის, ირაკლი ალასანიას განმარტებით, აღნიშნულ აქციას გამაფრთხილებელი ხასიათი ექნება. რაც შეეხება პარტიის საქმიანობას, ის საგანგებო მოქმედების რეჟიმზე გადადის, თუმცა არჩევნების გზიდან გადახვევას არ აპირებს:

"დღეს ყველა ჩვენგანს უმძიმესი დღე გვქონდა. ერთადერთი, რაც ვინატრე, რომ იმ ხუთი ადამიანის ნაცვლად მე დავეკავებინე. ეს 5 უდანაშაულო ადამიანი სასამართლომ დამნაშავედ ცნო და თითოეულს მიუსაჯა 7 წელი ციხეში. მე, როგორც ოფიცერი, მოქალაქე და პოლიტიკოსი ბოლომდე ვიბრძოლებ. ვპირდები უსამართლოდ დაპატიმრებული ღირსეულ ბიჭებსა და მათი ოჯახების წევრებს, რომ არ მიგატოვებთ ტყვეობაში, არ დაგტოვებთ ამ ბრძოლაში ერთი ერთზე უსამართლობასთან".

ალასანიამ ასევე განმარტა, რომ აღნიშნულ საქმეზე განაჩენი ბიძინა ივანიშვილმა მოსამართლე ბუგიანიშვილის ხელით გამოიტანა:

"უსამართლობა და ცინიზმი ისევ მთელი ძალით ბოგინობს ჩვენს ქვეყანაში. შეიცვალა მხოლოდ ამ საშინელი სისტემის მთავარი არქიტექტორი. ის ახლა არის ბიძინა ივანიშვილი. ვიდრე პროკურატურის და სასამართლოს პოლიტიკის ინსტრუმენტებად გამოყენების მანკიერ წრეს არ გავწყვეტთ, ჩვენ უსამართლობის მსხვერპლნი ვიქნებით".

ალასანიას განმარტებით, დამნაშავედ ცნობილ პირებს აღნიშნული დანაშაულის ჩადენისათვის მოტივი არ გააჩნდათ და არ განკარგავდნენ იმ თანხას, რომელთა გაფლანგვაშიც მათ ბრალს სდებენ:

"ჩვენ არ მივატოვებთ ამ ადამიანებს. ვპირდებით საზოგადოებას, ყველა ღონეს ვიხმართ ამ ადამიანების ციხიდან დასახსნელად. ჩვენ, კონსტიტუციური ნორმების სრული დაცვითა და ყველა კანონიერი გზით, მათ შორის აქციებით, ვიბრძოლებთ სამართლიანობის აღდგენისათვის".

თავისუფალი დემოკრატების ლიდერის განცხადებით, მომდევნო 3 დღის განმავლობაში პარტია არასამთავრობო ორგანიზაციებსა და დიპლომატიური კორპუსის წარმომადგენლებს შეხვდება. მისი თქმით, თავისუფალი დემოკრატები ასევე აპირებენ სასამართლოს დღევანდელი გადაწყვეტილების შესახებ ინფორმაცია საერთაშორისო ორგანიზაციებსა და მეგობარი ქვეყნების დედაქალაქებსაც მიაწოდონ.