პარტია ლელოს ერთ-ერთმა ლიდერმა, ბადრი ჯაფარიძემ განაცხადა, რომ არაპროპორციული ძალის გამოყენება ყოველთვის იწვევს პროტესტის გამძაფრებას და ხელისუფლების მხრიდან აქციის წყლის ჭავლით დაშლის მცდელობა გამოსავალი არ არის.

"ხალხი იცავს მის სამართლიან უფლებას, რომ მოითხოვონ მათ მიერ მიცემული ხმების ზუსტად ასახვა ოქმებში, რასაც ვერ მივაღწიეთ. აქ თავმოყრილი ხალხი არის ძალიან მშვიდობიანად განწყობილი, ისინი არ აპირებენ რაიმე აგრესიულ ქმედებას, აქედან გამომდინარე, მე არ ველოდები რაიმე გამწვავებას, თუკი ისევ პოლიციის მხრიდან არ იქნება, ან არ უბრძანებენ, რომ რაიმე ძალისმიერი მეთოდი გამოიყენონ. აქ არის სიმშვიდე, არ ველოდებით არანაირ ესკალაციას", — განაცხადა ბადრი ჯაფარიძემ.

ჯაფარიძის თქმით, ქართული ოცნების წარმომადგენლების განცხადებები არის პირდაპირ ცეცხლზე ნავთის დასხმის ტოლფასი, იმიტომ, რომ აგდებული დამოკიდებულება აქვთ შეკრებილი ხალხის მიმართ, რაც პირიქით, ზრდის მუხტს.

სპეცრაზმმა აქცია გაფრთხილების გარეშე დაშალა — რა ხდება ცესკოსთან

დღეს, 8 ნოემბერს ოპოზიციამ პარლამენტთან საპროტესტო აქცია გამართა, რომელზეც მთავრობას სამი მოთხოვნა წამოუყენა და დრო რვა საათამდე მისცა. ისინი ხელახალ არჩევნებს, ცესკოს თავმჯდომარის გადადგომას და პოლიტპატიმრების გათავისუფლებას ითხოვდნენ. ულტიმატუმის ვადის ამოწურვის შემდეგ ნიკა მელიამ განაცხადა, რომ მათთან კონტაქტზე მყოფმა ირაკლი კობახიძემ და არჩილ თალაკვაძემ ხვალ შეხვედრა შესთავაზეს, რასაც არ დათანხმდებოდნენ. ეს კობახიძემ უარყო და ამტკიცებდა, რომ შეხვედრა ოპოზიციამ მათ შესთავაზა და ამას მხოლოდ პარტნიორების სურვილის შემთხვევაში დათანხმდებოდნენ.

რვა საათის შემდეგ ოპოზიციამ განაცხადა, რომ ცესკოსთან გადაინაცვლებდნენ და არავის მისცემდნენ შიგნით შესვლის ან იქედან გამოსვლის უფლებას. სანამ ოპოზიცია მსვლელობით მივიდოდა, ცესკოსთან რამდენიმე ადამიანი შეიკრიბა. ადგილზე მობილიზებული იყო პოლიცია, რომელთა რაოდენობაც იზრდებოდა. ცესკოსთან მოხდა რამდენიმე დაპირისპირებაც, თუმცა მალევე აღმოიფხვრა.

ამის შემდეგ კი ადგილზე სპეცრაზმი გამოჩნდა, რომელმაც გაფრთხილების გარეშე დაიწყო წყლის ჭავლის გამოყენება აქციის მონაწილეების წინააღმდეგ. აქციაზე გაუშვეს სავარაუდოდ ცრემლსადენი გაზიც, თუმცა შსს ამას უარყოფს. რაც შეეხება წყლის ჭავლს, ამას პროპორციულ ძალად მიიჩნევს. ამ ეტაპზე არსებული ინფორმაციით, აქციის დაშლისას 2 ადამიანი დაშავდა.

უფლებადამცველები, ყოფილი და მოქმედი სახალხო დამცველები კი აცხადებენ, რომ აქციის დაშლა ამ მეთოდით არაკანონიერი იყო და არღვევდა გამოხატვის თავისუფლებას. მათივე თქმით, ეს იყო სასტიკი და არაპროპორციული ძალა.

ამ წუთებშიც ცესკოსთან აქცია გრძელდება და ისევ მობილიზებულია წყლის ჭავლის მანქანა და სპეცრაზმი. ადგილზე იმყოფებიან ოპოზიციის ლიდერებიც.

გაიგეთ მეტი მომხდარის პოლიტიკურ შეფასებებზე: