დამოუკიდებელი რუსული მედიის ცნობით, საქართველომ რუსეთის არმიიდან დეზერტირ ვლადისლავ ტატარინცევს ერთწლიანი საერთაშორისო დაცვა მიანიჭა. თუ ინფორმაცია დადასტურდება, ეს იქნება პირველი საჯაროდ ცნობილი შემთხვევა რუსეთის მიერ უკრაინაში ფართომასშტაბიანი შეჭრის შემდეგ, როდესაც საქართველომ რუს დეზერტირს თავშესაფარი მიანიჭა. ინფორმაციას OC media ავრცელებს.

როგორც ტატარინცევის პარტნიორმა და ინტერნეტის თავისუფლების მხარდასაჭერად შექმნილი ორგანიზაცია Scarlet Swan-ის თანადამფუძნებელმა, სოფია ჩეპიკმა განაცხადა, ტატარინცევმა რუსეთის თავდაცვის სამინისტროსთან კონტრაქტი 2024 წლის ბოლოს გააფორმა, 2025 წლის ზაფხულში კი ოკუპირებულ უკრაინაში, ავდიივკასთან გადაიყვანეს, სადაც ინჟინრად მუშაობდა. მან ნაწილი ანტისაომარი პროექტის, Go Through the Forest-ის დახმარებით დატოვა.

გამოცემების ცნობით, ტატარინცევი საქართველოში არალეგალურად შემოვიდა. 2026 წლის ზაფხულში მან და Scarlet Swan-ის თანადამფუძნებელმა, სოფია ჩეპიკმა თურქეთში გადასვლა სცადეს — ჩეპიკმა საზღვარი კანონიერად გადაკვეთა, ხოლო ტატარინცევი მესაზღვრეებმა დააკავეს. პატიმრობაში ყოფნისას მან თავშესაფართან დაკავშირებით განაცხადი შეიტანა. მიუხედავად საერთაშორისო დაცვის მიღებისა, მასზე აღძრული სისხლის სამართლის საქმე (რომელიც არალეგალურ შემოსვლას უკავშირდება) ძალაში რჩება და დაკავებულს საქართველოში პატიმრობა კვლავ ემუქრება.