საქართველოს მე-3 პრეზიდენტი, მიხეილ სააკაშვილი ცხოველთა უფლებადამცველის, თამაზ ელიზბარაშვილს დაპატიმრებას ეხმაურება და წერს, რომ "ელიზბარაშვილი "იმედის" ნაძირალებთან ქიშპობის გამო არ დაუჭერიათ. მას პროვოკაცია მოუწყვეს მთავარი ქოცური საიდუმლოს,"ციხის კადრების" გათქმისთვის". სააკაშვილი იმასაც წერს, რომ "თუ ვინმე არის ციხეში ლიკვიდაციის კანდიდატი — სწორედ ეს ცოტა ხნის წინ "ქოცური" გმირია".

"ელიზბარაშვილს აუკრძალეს წერილების წერა, დარეკვა და პაემნები. თითქმის ჩაუკეტეს კონტაქტი გარე სამყაროსთან. მე მგონია, თუ ვინმე არის ციხეში ლიკვიდაციის კანდიდატი — არის სწორედ ეს ცოტა ხნის წინ "ქოცური" გმირი.

რატომ ვფიქრობ ასე? იმიტომ, რომ ამ აკრძალვებმა დამიდასტურა ის, რომ ის "იმედის" ნაძირალებთან ქიშპობის გამო არ დაუჭერიათ. მას პროვოკაცია მოუწყვეს და ჩაკეტეს, რამდენიმე დღით ადრე მთავარი ქოცური საიდუმლოს გათქმისთვის, ნანუკას "უმრავლესობის" პლატფორმაზე, რომ "ციხის კადრები", რომელმაც ფინთი გოიმივით ააგდო ლამის მთელი საქართველო, სინამდვილეში მოგონილი და დადგმული იყო, მისი მონაწილეობით და არაფერი საერთო არ ჰქონდა რეალობასთან.

საქმე იმაშია, რომ ციხის ცოცხიანი კადრები, ისეთივე ფუძემდებლური საფუძველია ქოციზმისთვის, როგორც ქრისტეს ჯვარცმა და აღდგომა არის ქრისტიანებისთვის.

აი, წარმოიდგინეთ, რომ ქრისტიანებს მოგვადგეს ვიღაც ტიპი და გვითხრას, არანაირი ქრისტეს ჯვარცმა არ მომხდარა, სინამდვილეში მე ვიყავი ის მსახიობი, რომელიც თქვენს დასანახად ჯვარს მაცვეს ცოტა ხნით და შემდეგ კარგად მაქეიფეს და წავედი სახლში დასაძინებლადო. დაახლოებით იგივე უთხრა ქოც-მორწმუნეებს ელიზბარაშვილმა.

ხოდა პატრონმა ეს არ აპატია და ახლა თუ არ გაჩუმდება, მძიმე მეტალების მთელი მარაგი ჩემზე კი არ დაუხარჯავთ და ელიზბარაშვილისთვისაც რჩება ცოტა. ხოდა შეუთვალეთ ჩემგან, თუ უნდა ცოცხალი გადარჩეს, მოყვეს ბოლომდე ყველაფერი, კერძოდ:

ა) რა იყო ბედუკაძის კავშირები რუსებთან.
ბ) როგორ ცდილობდნენ კადრების მიყიდვას ჯერ ბურჯანაძისთვის და შემდეგ როგორ მიჰყიდეს ივანიშვილს.
გ) კიდევ რა პროვოკაცია ჰქონდათ მაშინ დაგეგმილი, რისი განხორციელებაც ვერ მოასწრეს.
რადგან დაიწყე პატრონის ჩაშვება, ბარემ ბოლომდე თქვი ყველაფერი კაცო!", — წერს სააკაშვილი.

შეგახსენებთ, რომ ელიზბარაშვილმა იუთუბ-არხ "მისმინეში" თქვა, რომ 2012 წლის ციხის კადრები დადგმული იყო და მათი შექმნის იდეაში თავადაც მონაწილეობდა. მისი თქმით, ციხეებში რეალური ძალადობა იყო — ცემა და ე.წ. "დუბინკები", თუმცა ცოცხები არ ყოფილა; "ცოცხების" ეპიზოდი, მისი თქმით, საზოგადოებაზე ზემოქმედებისთვის მოიფიქრეს. მან ასევე თქვა, რომ ლადო ბედუკაძესთან ერთად ამ კადრების გავრცელების იდეის განხორციელებაში მონაწილეობდა.