პარლამენტის საპროცედურო საკთხთა კომიტეტმა მაია ბითაძის ადგილმონაცვლედ ქეთევან ხუროძის დამტკიცების შესახებ გადაწყვეტილებას მხარი დაუჭირა.

აღსანიშნავია, რომ ხუროძე ქართული ოცნების პარტიულ სიაში შემდეგი იყო, ვინც ადგილმონაცვლე უნდა ყოფილიყო.

ცნობისთვის, მაია ბითაძე ორი დღის წინ პრემიერმა ირაკლი კობახიძემ კულტურის მინისტრად დანიშნა. ის გარემოს დაცვისა და ბუნებრივი რესურსების კომიტეტს ხელმძღვანელობდა. მის შემცვლელად პარლამენტმა ორი დღის წინ თორნიკე ჭეიშვილი დაამტკიცა.

ქეთევან ხუროძე "მეიდანი ჯგუფში" შემავალი კომპანია შპს "მეიდანია ფროფერთის" დირექტორია, რომელიც უძრავი ქონების მართვისა და განვითარების კომპანიაა. ასევე, სამეწარმეო რეესტრის თანახმად, იკავებს შპს "ძველი მეიდანის" და შპს "სიღნაღის ეთნოპარკის" დირექტორის პოსტსაც. გარდა ამისა, ხუროძე ფლობს 25%-იან წილს შპს "ჯეონათში", რომელიც თხილის სექტორში ოპერირებს.

ქეთევან ხუროძე აღმოსავლეთ-დასავლეთ უნივერსიტეტის (East-West University) ვიცეპრეზიდენტიცაა. როგორც აღნიშნული უნივერსიტეტის ვებგვერდზე წერია, ქეთევან ხუროძემ 2007 წელს დაამთავრა თბილისის სახელმწიფო უნივერსიტეტის იურიდიული ფაკულტეტი; 2010 წელს კავკასიის უნივერსიტეტის კავკასიის სამართლის სკოლა; ხოლო შემდგომ გაიარა დოქტორანტურა სამოქალაქო სამართლის მიმართულებით, საქართველოს ტექნიკურ უნივერსიტეტში. აქვს როგორც იურიდიულ და საგანმანათლებლო, ისე პროექტების მართვის მიმართულებით მუშაობის მრავალწლიანი გამოცდილება.