"არქის" პარტნიორმა, ისრაელელმა დეველოპერმა მენი ბენიშმა გამოცემა Ynetnews-თან ინტერვიუში განაცხადა, რომ "ტრამპ თაუერში" გაყიდვების დაწყებისას ფასები კვადრატულ მეტრზე დაახლოებით $7,000-დან დაიწყება, ზედა სართულებზე $10,000-ს მიაღწევს, თუმცა შემდგომში შესაძლოა $15,000-საც კი მიაღწიოს. მიუხედავად იმისა, რომ ისრაელის მასშტაბით ეს ფასი მაღალი არ არის, ქართული რეალობისთვის ეს რეკორდული მაჩვენებელია. მისი თქმით, უკვე არსებობს პოტენციურ მყიდველთა სია, ძირითადად დუბაიდან და სხვა ქვეყნებიდან.

ბენიშმა ასევე აღნიშნა, რომ "ტრამპის ორგანიზაცია" პროექტის ყველა დეტალში — დიზაინიდან დაწყებული საზოგადოებასთან ურთიერთობით დასრულებული — აქტიურად არის ჩართული. აპარტამენტების შიდა მოწყობა ისეთივე მაღალტექნოლოგიური და დახვეწილი იქნება, როგორც მსოფლიოს წამყვანი სასტუმროების (Four Seasons, Ritz-Carlton), სადაც ყველაფერი, ფარდებიდან და ავეჯიდან დაწყებული, მკაცრ სტანდარტებს დაექვემდებარება.

შეგახსენებთ, გუშინ, 15 სექტემბერს თბილისის ცენტრში, მთაწმინდაზე Downtown Tbilisi-სა და მისი მთავარი სიმბოლოს, Trump Tower Tbilisi-ის პრეზენტაცია გაიმართა. პროექტის ჯამური ინვესტიცია 2 მილიარდი დოლარია და ის 600 ათას კვადრატულ მეტრზე გაშლილ თანამედროვე სივრცეს მოიცავს.

მხოლოდ "ტრამპ თაუერი" დაახლოებით 100,000 კვადრატულ მეტრს დაიკავებს და მისი პირდაპირი სამშენებლო ღირებულება 200 მილიონ დოლარს გადააჭარბებს. რადგან საქართველოში ამ მასშტაბის გამოცდილება არ არსებობს, მიმდინარეობს ტენდერი ძირითადი სამშენებლო კონტრაქტორის შესარჩევად, სადაც ძირითადად თურქული და აზერბაიჯანული კომპანიები განიხილებიან.

მთავრობის მიერ გავრცელებული ინფორმაციით, 280 მეტრის სიმაღლის, 62-სართულიანი შენობა თბილისს მსოფლიოს წამყვანი ურბანული ცენტრების გვერდით დააკავშირებს.

პროექტში ჩართულია გლობალური ბრენდი "ტრამპის ორგანიზაცია", არქიტექტურული ფირმა Gensler (ვაშინგტონის ოფისი) და ქართული კომპანიები ("არქი", "ინვია", "საფირ ორგანიზაცია", "ფინვესტი", "ბლოქსტოუნ კაპიტალი", "ვექტორ ჯგუფი").