თბილისის საჯარო ბაგა-ბაღების კვებით უზრუნველყოფისთვის ცენტრალურ შემსყიდველ ორგანოს მიმდინარე თვეს რამდენიმე ტენდერი ჰქონდა გამოცხადებული, თუმცა, შესყიდვების სააგენტოს ოფიციალურ ვებგვერდზე გამოქვეყნებული ინფორმაციის მიხედვით, არცერთი მათგანი არ შედგა. მიზეზი ისაა, რომ არცერთ მათგანში წინადადება არცერთმა კომპანიამ არ წარადგინა.

ჩავარდნილი ტენდერები:

1. საქონლის ხორცის (გაციებული) შესყიდვა ­­— სავარაუდო ღირებულება 10,1 მლნ ლარი. წინადადებების მიღება დღეს 17:00 საათზე დასრულდა. პრეტენდენტები არ არიან. აღსანიშნავია, რომ ხორცის შესყიდვის მიზნით ტენდერი რამდენიმეჯერ ჩაიშალა ბოლო ერთ თვეში.

2. ტომატ-პასტა და ხილფაფების შესყიდვა — სავარაუდო ღირებულება 328 071 ლარი, წინადადებების მიღება დღეს 15:30 საათზე დასრულდა. პრეტენდენტები არ არიან. აღნიშნული პროდუქტის შესაძენად ტენდერი აგვისტოს დასაწყისშიც გამოცხადდა, თუმცა უარყოფითი შედეგით დასრულდა.

3. ორაგულის ფილე — სავარაუდო ღირებულება 3,5 მლნ ლარი, წინადადებების მიღება 14 სექტემბერს დასრულდა. პრეტენდენტები არ არიან. აღნიშნული ტენდერი აგვისტოშიც უშედეგოდ დასრულდა.

აღსანიშნავია, რომ გასულ თვეს გამოცხადებული რამდენიმე ტენდერი თბილისის საბავშვო ბაგა-ბაღების კვებით უზრუნველყოფის მიზნით შედგა.

შემდგარი ტენდერები:

1. ყველის შესყიდვა ­— 6 აგვისტოს გამოცხადებულ ტენდერში, რომლის სავარაუდო ღირებულება 1,7 მლნ ლარი იყო, შპს "რიომ" გაიმარჯვა. მას 2027 წლის 31 ივლისამდე ევალება თბილისის ბაღებისთვის ყველის მიწოდება.

2. მარილის, საფუარის, ხილის ჩაის, ვანილის, ძმრის, სოდის, ორცხობილას, მაკარონის, ვერმიშელის, შაქრის, ვაშლის ჩირის, ქიშმიშის შესყიდვა ­— 6 აგვისტოს გამოცხადებულ ტენდერში, რომლის სავარაუდო ღირებულება 990 528 ლარი იყო, შპს "ინმა" გაიმარჯვა. მას 2027 წლის 31 ივლისამდე ევალება თბილისის ბაღებისთვის ყველის მიწოდება.

3. ქათმის ხორცის შესყიდვა — შესყიდვის ღირებულება 1,8 მლნ ლარი. აღნიშნული ტენდერიც 6 აგვისტოს გამოცხადდა და მასშიც შპს "ინმა" გაიმარჯვა.

ცნობისთვის, გუშინ თბილისში 20 ბაგა-ბაღში 55 აღსაზრდელი და 1 აღმზრდელი მოიწამლა. ამის შესახებ ინფორმაციას ფინანსთა სამინისტროს საგამოძიებო სამსახურმა გამოძიება დაიწყო. პარალელურად, სურსათის ეროვნული სააგენტო ლაბორატორიულ მოკვლევას აწარმოებს. მომხდარის გამო, დღეს 7 საჯარო ბაღში სააღმზრდელო პროცესი შეწყვეტილი იყო. პირველადი მონაცემებით, ინტოქსიკაცია საკვებს უკავშირდება.