თვითიზოლაციაში მყოფი პრემიერმინისტრის, გიორგი გახარიას განცხადებით, ქუჩაში მიმდინარე საპროტესტო აქციები დააჩქარებს ქვეყანაში კორონავირუსის პიკის დადგომას. ამის შესახებ მან საკოორდინაციო საბჭოს სხდომაზე ვიდეოზარით ჩართვისას განაცხადა.

"რა თქმა უნდა, ეს პოლიტიკური აქტივობები, რაც ქუჩაში ხდება, ძალზედ დააჩქარებს ჩვენთან პიკის მოსვლას. უფრო მძიმე სიტუაცია იქნება, ვიდრე ჩვენ ველოდით. იმიტომ, რომ რეალურად ეს მობილობა, რასაც ახლა ქუჩის აქციები იწვევენ, პირდაპირ კავშირშია ინფიცირების სწრაფ ზრდასთან", — განაცხადა მან.

ამიტომ, მან სრული მობილიზაციისკენ მოუწოდა ყველა სამინისტროსა და უწყებას და განაცხადა, რომ წერტილოვანი შეზღუდვების გააქტიურებაზე უნდა დაიწყონ ფიქრი.

გახარია კოვიდინფიცირებულია და ის დადასტურების შემდეგ დისტანციურად მუშაობს. მისი თქმით, კორონავირუსი, სავარაუდოდ, ინფიცირებული თანამშრომლისგან გადაედო. კორონავირუსის დადასტურებამდე პრემიერი თავადაც ესწრებოდა ქუჩაში მიმდინარე პოლიტიკურ აქტივობებს, კერძოდ წინასაარჩევნო შეხვედრებს ამომრჩევლებთან.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: