დამოუკიდებელი და თავისუფალი არტისტების ჯგუფმა სახელმწიფოს უმოქმედობა პერფორმანსით გააპროტესტა 17 მაისს შინაგან საქმეთა სამინისტროსთან, სადაც სიმბოლურად მიიტანეს ცისარტყელას ფერებით მორთული კუბო:

"პერფორმანსით არტისტებმა ვაჩვენეთ, როგორ დაასამარა ხელისუფლების შტოებმა და ეკლესიამ სახელმწიფო!"

აქციის ორგანიზატორების თქმით, პერფორმანსის ჩატარება შსს-სთან იმიტომ გადაწყდა, რომ მათ სამართალდამცავმა უწყებამ ვერ მისცა უსაფრთხოების გარანტიები ჰომოფობიის წინააღმდეგ საჯარო აქციის ჩასატარებლად. შინაგან საქმეთა სამინისტროს შემდეგ, აქტივისტებმა ლგბტ მოძრაობის სიმბოლო, დროშა ცისარტყელას ფერებში, გაშალეს თბილისის საკრებულოსთან და სასამართლოსთან, სადაც დღეს დილით დაკავებული სხვა აქტივისტების სასამართლო პროცესი მიმდინარეობდა.

17 მაისი მსოფლიოში ჰომოფობიასთან და ტრანსფობიასთან ბრძოლის საერთაშორისო დღეა. 1990 წლის 17 მაისს მსოფლიო ჯანდაცვის ორგანიზაციამ ჰომოსექსუალობა ამოიღო მენტალურ დაავადებთა სიიდან, რის შემდეგაც, ლგბტ აქტივისტები ამ დღეს ჰომოფობიასთან ბრძოლით აღნიშნავენ.

ლგბტ აქტივისტების პროტესტი თბილისის საქალაქო სასამართლოსთან. 17 მაისი, 2016.

ფოტო: Tina Agnus

2013 წლის 17 მაისს მართლმადიდებელმა სასულიერო პირებმა ლგბტ აქტივისტებს თბილისში, თავისუფლების მოედანზე არ მისცეს ამ დღის აღნიშვნის უფლება და აქცია დაარბიეს, 2014 წელს, საქართველოს მართლმადიდებელი ეკლესიის კათალიკოს პატრიარქმა ილია მეორემ 17 მაისი ოჯახის სიმტკიცის დაცვის დღედ გამოაცხადა. სწორედ მას შემდეგ, ამ დღეს მართლმადიდებელი მრევლი რუსთაველის გამზირზე ხატებით მსვლელობას აწყობს სამების ტაძრისკენ. მსგავსი მსვლელობა გაიმართა 2016 წელსაც.