ჰომოფობიასა და ტრანსფობიასთან ბრძოლის საერთაშორისო დღეს, 17 მაისს, გამთენიისას, თბილისში 10 ლგბტ აქტივისტი იმ დროს დააკავეს, როცა ისინი მართლმადიდებელი ეკლესიის საპატრიარქოს ღობეზე წარწერის გაკეთებას ცდილობდნენ.

როგორც On.ge-ს შინაგან საქმეთა სამინისტროში განუცხადეს, ისინი დაკავებულები არიან ადმინისტრაციულ სამართალდარღვევათა კოდექსის 150-ე მუხლის მიხედვით, რაც გულისხმობს სხვადასხვა სახის წარწერების, ნახატებისა და სიმბოლოების თვითნებურ შესრულებას შენობების ფასადებზე, ღობეებზე და ა.შ. სამართალდარღვევა პირველ ჯერზე 50-ლარიან ჯარიმას ითვალისწინებს.

შსს-ს ინფორმაციით, დაკავებულთა ნაწილს ასევე ედავებიან ადმინისტრაციულ სამართალდარღვევათა კოდექსის 173-ე მუხლის დარღვევას. აღნიშნული მუხლი გულისხმობს პოლიციელისადმი დაუმორჩილებლობას, რაც იწვევს დაჯარიმებას 400 ლარის ოდენობით ან გამასწორებელ სამუშაოებს ერთიდან ექვს თვემდე ვადით, ხელფასიდან 20%-ის დაქვითვით, ხოლო თუ საქმის გარემოებათა და დამრღვევის პიროვნების გათვალისწინებით ამ ზომების გამოყენება არასაკმარისად იქნება მიჩნეული, ადმინისტრაციულ პატიმრობას 90 დღემდე ვადით.

ლგბტ აქტივისტების დაკავებაზე ფეისბუკის საშუალებით ინფორმაცია გაავრცელა ლგბტ საქართველოს აღმასრულებელმა ხელმძღვანელმა ლევან ბერიანიძემ: "ამ წამს ლგბტ აქტივისტები დააკავეს ქუჩაში სტენსილების გაკეთების გამო და განყოფილებაში ჰყავთ გადაყვანილი. როგორც შემატყობინეს, პოლიცია იქცეოდა და იქცევა ძალადობრივად: ქუჩაში ძირს ახოხიალეს აქტივისტები, ფიზიკურად შეეხნენ და იყვნენ ძალიან აგრესიულები. ამ წამს მე და ნინო ბოლქვაძე გავდივართ იმ განყოფილებაში, სადაც ისინი არიან. როგორც გავიგე, ორთაჭალაში ჰყავთ ძველი თბილისის პირველ, ან მესამე განყოფილებაში - მისამართს არ ეუბნებიან წესიერად და ტელეფონში ძლივს მოასწრო ერთ-ერთმა აქტივისტმა უცბად მისამართის თქმა და ტელეფონიც ჩამოართვეს. უშიშროების თანამშრომლები უკვე ატერორებდნენ და ემუქრებოდნენ რამდენიმე ლგბტ აქტივისტს ამ დღეებში. ახლა კიდევ ეს! ეს არის სახელმწიფოს მხრიდან განხორციელებული რეიდი და ტერორი ლგბტ აქტივისტებზე წელს!"

ლგბტ აქტივისტები საპატრიარქოს ღობეზე ცდილობდნენ წარწერის, სიყვარული თანასწორია, გაკეთებას.