თბილისის საქალაქო სასამართლომ სახელმწიფო ბიუჯეტის კუთვნილი 768 107 ლარის მითვისების და გაფლანგვის ფაქტებზე, სამხედრო პოლიციის ყოფილი უფროსი მეგის ქარდავა დამნაშავედ ცნო.

პროკურატურის ცნობით, 2012 წლის 22 მაისს, სამხედრო პოლიციის დეპარტამენტის უფროსმა მეგის ქარდავამ, ფარული ხარჯების მუხლით, სამხედრო პოლიციის დეპარტამენტისთვის 330 000 ლარის გამოყოფის მოთხოვნით იმჟამინდელ თავდაცვის მინისტრს ბაჩანა ახალაიას წერილით მიმართა. მინისტრის თანხმობით სამხედრო პოლიციის დეპარტამენტის ანგარიშზე ჩარიცხული თანხა მეგის ქარდავას დავალებით ერთ-ერთი ბანკიდან გამოიტანეს და მისი კონვერტაცია მოახდინეს, რის შემდეგაც 200 000 აშშ დოლარი მეგის ქარდავამ უკანონოდ მიითვისა.

გამოკვლეული მტკიცებულებებით ასევე დადგინდა, რომ ბრალდებულმა თავდაცვის სამინისტროს სხვა მაღალჩინოსნების დახმარებით 2011 წლის 16 ნოემბრიდან — 2012 წლის აგვისტოს ჩათვლით, თითქოსდა ოპერატიული მიზნობრიობით მართლსაწინააღმდეგოდ მიითვისა და გაფლანგა ჯამში 768 107 ლარი.

თავდაცვის სამინისტროს კუთვნილი თანხების მითვისების და გაფლანგვის ფაქტების დაფარვის მიზნით, მეგის ქარდავას დავალებით შედგა ფიქტიური დოკუმენტაცია, თითქოსდა ავღანეთის რესპუბლიკაში მივლენილი სამხედრო პოლიციის დეპარტამენტის ქვედანაყოფის მიერ, ოპერატიულ-სამძებრო საქმიანობისთვის ფულადი სახსრების დახარჯვის შესახებ, რითაც ხსენებული თანხები ჩამოიწერა და ბუღალტრულად გასწორდა.

ბრალდებულს ბრალდება 10 ეპიზოდზე საქართველოს სისხლის სამართლის კოდექსის 182-ე მუხლის მე-2 ნაწილის "ა" და "დ" ქვეპუნქტებით და მე-3 ნაწილის "ბ" ქვეპუნქტით (სამსახურებრივი მდგომარეობის გამოყენებით დიდი ოდენობით თანხის მითვისება და გაფლანგვა ჩადენილი წინასწარი შეთანხმებით ჯგუფის მიერ) წარედგინა.

თბილისის საქალაქო სასამართლომ ბრალდებული დამნაშავედ ცნო წარდგენილ ბრალდებაში და სასჯელის სახედ და ზომად 11 წლით თავისუფლების აღკვეთა განუსაზღვრა. 2012 წლის 28 დეკემბრის "ამნისტიის შესახებ" საქართველოს კანონის შესაბამისად დანიშნული სასჯელი განახევრდა და სასჯელის სახედ და ზომად 5 წლით და 6 თვით თავისუფლების აღკვეთა განესაზღვრა", — წერს პროკურატურა.

მეგის ქარდავა წლების განმავლობაში მიმალვაში იმყოფებოდა და მასზე ინტერპოლის წითელი ცირკულარით ძებნა იყო გამოცხადებული. ქარდავას ექსტრადირება საქართველოში 2021 წლის 17 სექტემბერს განხორციელდა.

ვინ არის მეგის ქარდავა?

მეგის ქარდავა 2011 წელს შსს-ს სამეგრელო-ზემო სვანეთის რეგიონული პოლიციის დეპარტამენტის უფროსის მოადგილე იყო, ხოლო შემდეგ თავდაცვის სამინისტროს სამხედრო პოლიციის დეპარტამენტის უფროსი გახდა.

მას ედავებოდნენ უფლებამოსილების გადამეტებას, წამებას, სექსუალურ ძალადობას, უკანონო თავისუფლების აღკვეთას, გამოძალვას და მოსკოვში მცხოვრები ქართველი გენერლის შეკვეთით მკვლელობის ორგანიზებას (სულ 11 სისხლის სამართლის საქმეში იყო ბრალდებული). 2012 წელს, ქართული ოცნების ხელისუფლებაში მოსვლის შემდეგ, ქარდავამ ქვეყანა დატოვა და გაძებნილად გამოცხადდა, 2014 წელს კი თბილისის საქალაქო სასამართლომ დაუსწრებლად 9 წლის თავისუფლების აღკვეთა მიუსაჯა პოლკოვნიკ სერგო თეთრაძის წამებისა და სექსუალური ძალადობის ორგანიზებისთვის.

მეგის ქარდავა უკრაინაში 2017 წლის ნოემბერში დააკავეს, ხოლო საქართველოში საბოლოოდ 2021 წლის 17 სექტემბერს იქნა ექსტრადირებული.