11 საერთაშორისო უფლებადამცველი და მედიის თავისუფლების ორგანიზაცია ევროპის საბჭოს საპარლამენტო ასამბლეის (PACE) წევრებს მოუწოდებს, საკუთარ მთავრობებთან დააყენონ საქართველოს წინააღმდეგ ადამიანის უფლებათა ევროპულ სასამართლოში სახელმწიფოთაშორისი სარჩელის შეტანის საკითხი. ორგანიზაციები წერენ, რომ ეს შესაძლებლობა ადამიანის უფლებათა ევროპული კონვენციის 33-ე მუხლით არის გათვალისწინებული და PACE-ის მიერ საქართველოს შესახებ 2026 წლის რეზოლუციაში ერთ-ერთ რეკომენდაციად არის მითითებული.

ეს ორგანიზაციებია: Committee to Protect Journalists (CPJ), Human Rights House Foundation (HRHF), Human Rights Watch (HRW), International Federation for Human Rights (FIDH), Index on Censorship, International Press Institute (IPI), International Rehabilitation Council for Torture Victims (IRCT), Netherlands Helsinki Committee, Norwegian Helsinki Committee, PEN International, World Organisation Against Torture (OMCT).

წერილის ავტორები მიიჩნევენ, რომ საქართველოში ადამიანის უფლებების დარღვევები და დემოკრატიული უკუსვლა უკვე ისეთ მასშტაბს და სისტემურ ხასიათს ატარებს, რომ ევროპის საბჭოს წევრმა სახელმწიფოებმა შესაბამისი სამართლებრივი მექანიზმის გამოყენება უნდა განიხილონ. მათი შეფასებით, 2024 წლიდან მიღებული კანონები და დაწესებული შეზღუდვები, მათ შორის უცხოურ გავლენასთან, გრანტებთან, შეკრებებთან, სამოქალაქო საზოგადოებასთან, დამოუკიდებელ მედიასა და LGBTQI ადამიანების უფლებებთან დაკავშირებული რეგულაციები, ერთმანეთთან დაკავშირებულ პროცესს წარმოადგენს და დამოუკიდებელი ორგანიზაციების საქმიანობას ზღუდავს.

ორგანიზაციები ხაზს უსვამენ, რომ სახელმწიფოთაშორისი სარჩელის წარდგენა ინდივიდუალური საჩივრების ალტერნატივა არ იქნება და დაზარალებულ ადამიანებს კვლავ შეეძლებათ საკუთარი საქმეებით ევროპულ სასამართლოს მიმართონ. მათი თქმით, სახელმწიფოთაშორისი საქმის განხილვამ შესაძლოა უფრო ფართო და სისტემური დარღვევების შეფასების შესაძლებლობა შექმნას.

წერილის ავტორები PACE-ის წევრებს სთხოვენ, მიმართონ საკუთარ მთავრობებს და დაიწყონ საქართველოსთან დაკავშირებით 33-ე მუხლის გამოყენების სამართლებრივი და მტკიცებულებითი საფუძვლების შეფასება. ასევე სთავაზობენ, საკითხი პარლამენტებში და შესაბამის კომიტეტებში დააყენონ, კონსულტაციები გამართონ ქართველ სამოქალაქო საზოგადოებისა და სამართლის ექსპერტებთან და საკითხზე ევროპის საბჭოს სხვა წევრ სახელმწიფოებთან კოორდინაცია დაიწყონ.

წერილში ასევე ნათქვამია, რომ მოქმედებისთვის ჯერ კიდევ არსებობს შესაძლებლობა, რადგან საქართველოში სამოქალაქო საზოგადოება აქტიურია და მოსახლეობა სამოქალაქო და პოლიტიკური უფლებებისა და ქვეყნის ევროპული მომავლის მხარდაჭერას აგრძელებს. ორგანიზაციების განცხადებით, მათი მიზანია, PACE-ის რეკომენდაცია 33-ე მუხლის გამოყენების შესახებ ევროპის საბჭოს წევრმა სახელმწიფოებმა კონკრეტულ სამართლებრივ და პოლიტიკურ საკითხად განიხილონ.