რუსეთს სურს დაიჯეროს, რომ სომხეთის მოქალაქეები შეძლებენ, ობიექტურად შეაფასონ იმ "ევროინტეგრაციის ავანტიურის საფრთხე", რომელშიც მათ ამჟამად ითრევენ, — ამის შესახებ სორუსეთის საგარეო საქმეთა სამინისტროს ევროპის დეპარტამენტის დირექტორმა და არქტიკულ საბჭოში რუსეთის წარმომადგენელმა ვლადისლავ მასლენნიკოვმა სააგენტო "რია ნოვოსტისთვის" მიცემულ ინტერვიუში განაცხადა.

"ქვეყნის განვითარების გზის საბოლოო არჩევანი, ნებისმიერ შემთხვევაში, სომხეთის მოქალაქეების ხელშია. ამ მხრივ, გვსურს გვჯეროდეს, რომ ისინი შეძლებენ, ობიექტურად შეაფასონ იმ "ევროინტეგრაციის ავანტიურის საფრთხე", რომელშიც მათ ახლა ითრევენ", — აღნიშნა მასლენნიკოვმა.

ცნობისთვის, სომხეთის პარლამენტმა 2025 წლის მარტში მიიღო კანონი ევროკავშირში გაწევრიანების პროცესის დაწყების შესახებ. მას შემდეგ რუსულმა მხარემ არაერთხელ აღნიშნა, რომ შეუძლებელია ერთდროულად იყო როგორც ევროკავშირის, ისე ევრაზიული ეკონომიკური კავშირის (EAEU) საბაჟო კავშირის წევრი.