არასამთავრობო ორგანიზაცია ლგბტ საქართველოს აღმასრულებელი დირექტორი ლევან ბერიანიძე აცხადებს, რომ მათთვის მიუღებელია, მათ ნაცვლად სხვამ გადაწყვიტოს, სად გამართონ ჰომოფობიის საწინააღმდეგო დღის აღსანიშნავი აქცია. მისივე თქმით, შინაგან საქმეთა სამინისტრომ მათ აქციის ჩასატარებლად რუსთაველის გარდა სხვა, ალტერნატიული ადგილი შესთავაზა.

"ვესწრებოდი შინაგან საქმეთა სამინისტროსთან შეხვედრას როგორც მხარდამჭერი, იქ იყვნენ სახელმწიფო სამსახურის სხვა წარმომადგენლებიც. შემოგვთავაზეს, რომ აქცია გაგვემართა მრგვალ ბაღში, ბათუმში ან თემქაზე", - თქვა ლევან ბერიანიძემ ფონდ ღია საზოგადოება - საქართველოს ოფისში გამართულ პრესკონფერენციაზე დღეს, 17 მაისს.

2013 წლის შემდეგ საპატრიარქომ ტაბუ დაადო ამ ადგილს და ლგბტ აქტივისტებს გვითხრა, რომ არ ამ დღეს აქ გამოსვლის უფლებას არ გვაძლევდა

ლევან ბერიანიძე

ბერიანიძის თქმით, აქტივისტებისთვის პრინციპულად მნიშვნელოვანი იყო აქციის რუსთაველზე ჩატარება:

"2013 წლის შემდეგ საპატრიარქომ ტაბუ დაადო ამ ადგილს და ლგბტ აქტივისტებს გვითხრა, რომ არ ამ დღეს აქ გამოსვლის უფლებას არ გვაძლევდა. არც ერთ ინსტიტუციას არ უნდა ჰქონდეს მითითების უფლება კონკრეტულ ჯგუფზე, სად შეიკრიბონ და სად არა, ამას უნდა ადგენდეს საქართველოს კონსტიტუცია".

ლგბტ საქართველოს წარმომადგენლის თქმით, სახელმწიფომ ლგბტ თემს კვლავ ვერ მისცა უსაფრთხოდ შეკრების გარანტია:

"ეს უნდა განვიხილოთ როგორც ლგბტ ადამიანებზე ზეწოლის მცდელობა. ეკლესია ადგენს ვის, სად და როდის აქვს შეკრების უფლება და ამაში მას სახელმწიფო ვერ ეწინააღმდეგება. დღესდღეობით, ჩვენ ისევ ვდგავართ თეოკრატიის სერიოზული ნიშნების წინაშე. ესაა დემოკრატიის სერიოზული კრიზისი".

გუშინ შინაგან საქმეთა მინისტრის მოადგილემ, არჩილ თალაკვაძემ განაცხადა, რომ ლგბტ აქტივისტებისთვის დემონსტრაციის გასამართად ალტერნატიული ადგილი არ შეუთავაზებია. თალაკვაძის თქმით, თუ ჰომოფობიის წინააღმდეგ ღონისძიება გაიმართება იქ, სადაც შარშან, პოლიცია თავის ფუნქციას შეასრულებს, ის იმოქმედებს კანონმდებლობის ფარგლებში. შარშან აქციები სამ ადგილას გაიმართა და აქტივისტების უსაფრთხოება სრულად იყო დაცული".

17 მაისი მსოფლიოში ჰომოფობიასთან და ტრანსფობიასთან ბრძოლის საერთაშორისო დღეა. 1990 წლის 17 მაისს მსოფლიო ჯანდაცვის ორგანიზაციამ ჰომოსექსუალობა ამოიღო მენტალურ დაავადებთა სიიდან, რის შემდეგაც, ლგბტ აქტივისტები ამ დღეს ჰომოფობიასთან ბრძოლით აღნიშნავენ.

2013 წლის 17 მაისს მართლმადიდებელმა სასულიერო პირებმა ლგბტ აქტივისტებს თბილისში, თავისუფლების მოედანზე არ მისცეს ამ დღის აღნიშვნის უფლება და აქცია დაარბიეს, 2014 წელს, საქართველოს მართლმადიდებელი ეკლესიის კათალიკოს პატრიარქმა ილია მეორემ 17 მაისი ოჯახის სიმტკიცის დაცვის დღედ გამოაცხადა. სწორედ მას შემდეგ, ამ დღეს მართლმადიდებელი მრევლი რუსთაველის გამზირზე ხატებით მსვლელობას აწყობს სამების ტაძრისკენ. მსგავსი მსვლელობა გაიმართა 2016 წელსაც.