გურჯაანის მუნიციპალიტეტში მცხოვრებ 60 წელს გადაცილებულ კაცს, რომელიც არასრულწლოვანზე რამდენიმე წლის განმავლობაში სექსუალურად ძალადობდა და მიმდინარე წლის აგვისტოში გააუპატიურა, ბრალი წარუდგინეს. მას 20 წლამდე პატიმრობა ემუქრება. ამის შესახებ ინფორმაციას პროკურატურა ავრცელებს.

უწყების ცნობით, "ბრალდებული დაზარალებულის უმწეობის გამოყენებით სისტემატურად ახორციელებდა სექსუალური ხასიათის სხვაგვარ ქმედებებს, მიმდინარე წლის აგვისტოში კი გააუპატიურა დაზარალებული. სამართალდამცველებმა ბრალდებული დანაშაულის შესახებ ინფორმაციის მიღებისთანავე დააკავეს.

დაკავებულს ბრალდება საქართველოს სისხლის სამართლის კოდექსის 138-ე მუხლის მე-3 ნაწილის "ა" და მე-4 ნაწილის "ა" ქვეპუნქტებით (სექსუალური ხასიათის სხვაგვარი ქმედება, არასრულწლოვანის, 14 წლის ასაკს მიუღწევლის მიმართ) და 137-ე მუხლის მე-4 ნაწილის "გ" ქვეპუნქტით (გაუპატიურება, არასრულწლოვანის მიმართ) წარედგინა, რაც სასჯელის სახედ და ზომად ოც წლამდე თავისუფლების აღკვეთას ითვალისწინებს.

პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით, სასამართლოს კანონით დადგენილ ვადაში მიმართავს", — წერია პროკურატურის მიერ გავრცელებულ განცხადებაში.