21-ე საჯარო სკოლის პედაგოგები, ყოფილი თუ მოქმედი მოსწავლეები და მშობლები 3 ძირითადი მოთხოვნით გამოდიან. ესენია: 21-ე საჯარო სკოლის საინჟინრო დასკვნის დამოუკიდებლად და საფუძვლიანად გადამოწმება; დემონტაჟამდე შენობის უსაფრთხოდ შენარჩუნებისა და რეაბილიტაციის შესაძლებლობის განხილვა; ხოლო სწავლის დროებით შეჩერების შემთხვევაში მოსწავლეებისა და პედაგოგებისთვის სრულფასოვანი ალტერნატიული სკოლის უზრუნველყოფა.

საინიციატივო ჯგუფი "21-ე საჯარო სკოლის გადასარჩენად" ითხოვს, რომ ბავშვები სხვადასხვა სკოლასა და კლასში შემთხვევით არ გადაანაწილონ და არ გადაიყვანონ მეორე ან მესამე ცვლაში, ასევე ალტერნატიულ სივრცეში შენარჩუნდეს გერმანული ენის პროგრამა, ინკლუზიური განათლება და უსაფრთხო სასწავლო გარემო.

"ჩვენ, 21-ე საჯარო სკოლის პედაგოგები, ყოფილი თუ მოქმედი მოსწავლეები, მშობლები — ვითხოვთ გადაწყვეტილებებს, რომლებიც ეფუძნება სრულ ინფორმაციას, ობიექტურ შეფასებას და სკოლის საზოგადოების ინტერესების გათვალისწინებას.

1. არსებული საინჟინრო დასკვნის საფუძვლიანად გადამოწმება.

მიგვაჩნია, რომ შენობის მომავალზე გადაწყვეტილების მიღებამდე საჭიროა დამატებითი, კომპლექსური და დამოუკიდებელი საინჟინრო-ტექნიკური ექსპერტიზა.
ამ პროცესში უნდა ჩაერთონ შესაბამისი დარგის დამოუკიდებელი სპეციალისტები და შეფასდეს არამხოლოდ შენობის დღევანდელი მდგომარეობა, არამედ მისი უსაფრთხოდ შენარჩუნებისა და რეაბილიტაციის ტექნიკური შესაძლებლობაც.

2. რეაბილიტაციის შესაძლებლობის განხილვა დემონტაჟამდე.

სანამ შენობის დემონტაჟის გადაწყვეტილება საბოლოოდ განხორციელდება, უნდა არსებობდეს პასუხი კითხვაზე - შესაძლებელია თუ არა მისი უსაფრთხოდ შენარჩუნება და რეაბილიტაცია. ასევე, პასუხი გაეცეს ყველა შეკითხვას, თუ კერძოდ რა საფრთხის შემქმნელია აღნიშნული შენობა.
თუ დამატებითი კვლევა დაადასტურებს, რომ ეს ტექნიკურად შესაძლებელია, ამ შესაძლებლობას უნდა მიეცეს რეალური განხილვის საშუალება.

3. ბავშვებსა და პედაგოგებს სჭირდებათ სრულფასოვანი ალტერნატიული სკოლა.

სანამ 21-ე სკოლაში სწავლა შეუძლებელია, მოსწავლეებსა და პედაგოგებს უნდა ჰქონდეთ დამოუკიდებელი და სრულფასოვანი სასწავლო სივრცე.
ეს არ უნდა ნიშნავდეს უბრალოდ სხვა შენობაში გადასვლას. ალტერნატიულ სივრცეში უნდა იყოს შესაძლებელი სრულფასოვანი სასწავლო პროცესის გაგრძელება, გერმანული ენის პროგრამის შენარჩუნება, ინკლუზიური განათლების უზრუნველყოფა და უსაფრთხო გარემოში სწავლა.

არ უნდა მოხდეს ბავშვების შემთხვევითი გადანაწილება სხვადასხვა სკოლასა და კლასში, ან მათი მეორე და მესამე ცვლაში გადაყვანა. 21-ე სკოლა უნდა დარჩეს ერთიან სასკოლო საზოგადოებად.

ჩვენი განსაკუთრებული მოთხოვნები:

  • 21-ე სკოლის იდენტობისა და საგანმანათლებლო სპეციფიკის შენარჩუნება;
  • 21-ე სკოლა მხოლოდ შენობა არ არის! ეს არის სკოლა თავისი ისტორიით, ადამიანებით, ტრადიციით და გერმანული ენისა და განათლების მიმართულებით ჩამოყალიბებული განსაკუთრებული პროფილით;
  • სკოლის შენობის საკითხზე გადაწყვეტილების მიღებისას არ უნდა დაიკარგოს ის, რაც 21-ე სკოლას 21-ე სკოლად აქცევს;
  • ჩვენ ვითხოვთ ჩართულობას გადაწყვეტილების მიღებაში!
  • სკოლის მომავალზე გადაწყვეტილებები არ უნდა მიიღონ სკოლის საზოგადოების გარეშე.
    მშობლებს, მოსწავლეებს, პედაგოგებსა და კურსდამთავრებულებს უნდა ჰქონდეთ შესაძლებლობა, მიიღონ სრული ინფორმაცია, დასვან კითხვები და საკუთარი მოსაზრებები რეალურად წარადგინონ გადაწყვეტილების მიღების პროცესში;
  • და ბოლოს, ჩვენ არ ვითხოვთ ბავშვების უსაფრთხოების ხარჯზე სკოლაში დაბრუნებას.

ჩვენ ვითხოვთ იმას, რაც ამ ეტაპზე ყველაზე მეტად გვჭირდება — სრულ ინფორმაციას, დამოუკიდებელ და ობიექტურ შეფასებას, უსაფრთხო და სრულფასოვან სასწავლო სივრცეს და 21-ე სკოლის საგანმანათლებლო ფუნქციისა და ერთიანობის შენარჩუნებას.

ეს არის ჩვენი ბავშვების განათლების, ჩვენი სკოლის და მისი მომავლის საკითხი", — წერია განცხადებაში.

საინიციატივო ჯგუფი "21-ე საჯარო სკოლის გადასარჩენად" დღეს, 17:00 საათზე, სკოლის წინ აქციას გამართავს.