პარლამენტის თავმჯდომარე შალვა პაპუაშვილი ბელგიაში ვიზიტის ფარგლებში ბელგიის წარმომადგენელთა პალატისა და სენატის ხელმძღვანელებს შეხვდა. მისი თქმით, შეხვედრებზე საქართველოსა და ბელგიას შორის ორმხრივ ურთიერთობებზე, ასევე საქართველოსა და ევროკავშირს შორის ურთიერთობებზე ისაუბრეს.

პაპუაშვილის განცხადებით, მნიშვნელოვანია, ევროკავშირის წევრმა სახელმწიფოებმა ევროკავშირის ინსტიტუტებთან იმუშაონ და დაარწმუნონ ისინი, რომ საქართველოსთან ურთიერთობაში პასუხი კონფრონტაცია კი არა, დიალოგია. მისი თქმით, საქართველო მზად არის ევროკავშირის სხვადასხვა ინსტიტუტთან დიალოგის აღსადგენად და იმედი აქვს, რომ ამ პროცესში ბელგიელი კოლეგებიც დაეხმარებიან.

"რომ ჩემი კოლეგების მოწვევით ვიმყოფებით ბელგიაში და ვსტუმრობთ ბელგიის წარმომადგენელთა პალატის და სენატის სენატს, ანუ მათ პრეზიდენტებს. ჩვენს ორმხრივ ურთიერთობაზე გვქონდა საუბარი. ჩვენს ორ პარლამენტს შორის კომიტეტების დონეზეც, მეგობრობის ჯგუფების დონეზეც არსებობს მჭიდრო ურთიერთობა. ეს ჩემი მეორე ვიზიტი არის ბელგიაში. სხვათა შორის, 2022 წელს პარლამენტის თავმჯდომარის პოზიციიდან ჩემი პირველი ოფიციალური ვიზიტი იყო ბელგიაში და გავიხსენეთ ის ვიზიტიც.

საუბარი გვქონდა საქართველოსა და ევროკავშირს შორის ურთიერთობაზე. ვისაუბრეთ იმაზე, რომ, სამწუხაროდ, 2024 წლის ივნისში ევროკომისიის გადაწყვეტილებაზე, რომ შეეჩერებინათ დიალოგი საქართველოსთან, რაც მიგვაჩნია, რომ იყო მცდარი გადაწყვეტილება, 2024 წლის ივნისში მიღებული გადაწყვეტილება, და დღემდე ჩვენ ველით ამ დიალოგის აღდგენას. მათ შორის კოლეგებთანაც გვქონდა ამაზე საუბარი, რომ მნიშვნელოვანია წევრმა სახელმწიფოებმა იმუშაონ ევროკავშირის ინსტიტუციებთან და დაარწმუნონ ევროკავშირის ინსტიტუციები, რომ პასუხები არის არა კონფრონტაციაში, დაპირისპირებაში, არამედ პასუხები ყოველთვის არის დიალოგში. ამიტომ მნიშვნელოვანია, რომ ბრიუსელი დაუბრუნდეს დიალოგის გზას.

ჩვენ ამის მზაობას ყოველთვის გამოვთქვამდით და იმედი გვაქვს, რომ გვექნება შესაძლებლობა, აღვადგინოთ დიალოგი ევროკავშირის სხვადასხვა ინსტიტუციებთან და იმედი გვაქვს, რომ ამაში ჩვენი ბელგიელი კოლეგებიც დაგვეხმარებიან", — განაცხადა პაპუაშვილმა.

შალვა პაპუაშვილი ოფიციალური ვიზიტით ბრიუსელში გაემგზავრა