ევროპული საქართველოს ერთ-ერთი ლიდერი, გიგა ბოკერია ამბობს, რომ ე.წ. ფოტოგრაფების საქმეში პოლიტიკური მოტივი არ იყო და სპეცსამსახურებში ზოგჯერ "პარანოიას" აქვს ადგილი. ამის შესახებ მან რუსთავი 2-ის ეთერში ისაუბრა.

"ფოტოგრაფების საქმე იყო ძალიან ცუდი საქმე. მტკიცებულებები იყო, სუსტიც არ ჰქვია მაგას, ამ ხალხის მიმართ, როცა ასეთ ბრალდებას აყენებ, ოღონდ პოლიტიკური მოტივი არ არსებობდა. 26 მაისის შესახებ კადრები მთელ მსოფლიოში გავიდა. ჩემი აზრი გაინტერესებთ, რატომ მოხდა? პარანოიას აქვს ხოლმე ადგილი ზოგჯერ სპეცსამსახურების მიერ და ეს ძალიან სახიფათო რამეა, გამართლებას კი არ ვცდილობ რამის. სპეცსამსახური რომ ხარ გელანდება ჯაშუშები და მერე იწყებ მოქმედებას და თუ არავინ გაკონტროლებს, ასეთი რამეები ხდება", — განაცხადა ბოკერიამ.

მისივე თქმით, ფოტოგრაფების საქმეში პოლიტიკური კამპანიის მოტივი არ არსებობდა მისი შედარება კარტოგრაფების საქმესთან არასწორია.

ე.წ. ფოტოგრაფების საქმე

2011 წლის 7 ივლისს შსს-ს თანამშრომლებმა ჯაშუშობის ბრალდებით დააკავეს ევროპის პრეს ფოტოსააგენტო ეპა-ს ფოტორეპორტიორი ზურაბ ქურციკიძე, საგარეო საქმეთა სამინისტროს ფოტორეპორტიორი გიორგი აბდალაძე, პრეზიდენტის ადმინისტრაციის ფოტორეპორტიორი ირაკლი გედენიძე და მისი ცოლი, რედაქცია პრაიმ ტაიმის ფოტორედაქტორი ნათია გედენიძე.

ისინი 2011 წლის 26 მაისს რუსთაველის გამზირზე ხელისუფლების საწინააღმდეგო საპროტესტო აქციის დროს მომიტინგეების დარბევას აშუქებდნენ.

დაკავებულ ფოტოგრაფებს ბრალად ედებოდათ "ერთ-ერთი უცხო ქვეყნის სპეცსამსახურის საფარქვეშ მოქმედი ორგანიზაციისთვის, საქართველოს ინტერესების საზიანოდ, მათი სამსახურებრივი მდგომარეობიდან გამომდინარე, სხვადასხვა სახის ინფორმაციის მიწოდებაში".

2017 წლის 20 ივლისს, ახალი ხელისუფლების პირობებში, თბილისის საქალაქო სასამართლომ ე.წ ფოტოგრაფების საქმეზე ბრალდებული მაღალჩინოსნების, ალექსანდრე მუხაძისა და დავით დევნოზაშვილის მიმართ გამამტყუნებელი განაჩენი დაადგინა. ბრალდების მხარის ცნობით, დავით დევნოზაშვილი იყო ის პირი, რომელმაც 2011 წელს ჯაშუშობაში ბრალდებულ ფოტოგრაფებს იძულებითა და შანტაჟით დააწერინა აღიარებითი ჩვენებები.

საქმის მასალების თანახმად, დევნოზაშვილმა დაკავებულების ფსიქოლოგიური ზეწოლისა და დაშინების გზით მოიპოვა წინასწარ შეთხზული ცრუ აღიარებითი ჩვენებები ჯაშუშურ ქსელში მონაწილეობის შესახებ.

სააპელაციო სასამართლოს გადაწყვეტილებით, დავით დევნოზაშვილი დამნაშავედ სცნეს სამსახურებრივი უფლებამოსილების გადამეტებაში, ჩადენილი ძალადობით და დაზარალებულის პირადი ღირსების შეურაცხყოფით. ალექსანდრე მუხაძე კი, ასევე გამტყუნდა სამსახურებრივი უფლებამოსილების გადამეტებისათვის, რამაც ფიზიკური პირის უფლების, საზოგადოების და სახელმწიფოს კანონიერი ინტერესის არსებითი დარღვევა გამოიწვია.

დავით დევნოზაშვილს განესაზღვრა 4 წლითა და 6 თვით თავისუფლების აღკვეთა. ასევე დამატებითი სასჯელის სახით 1 წლითა 4 თვის ვადით ჩამოერთვა თანამდებობის დაკავების უფლება. ალექსანდრე მუხაძეს კი საბოლოოდ განესაზღვრა 1 წლითა და 6 თვის ვადით თავისუფლების აღკვეთა, ამავე ვადით ჩამოერთვა თანამდებობის დაკავების უფლება.

ამასთან, 2018 წელს სააპელაციო სასამართლომ ფოტორეპორტიორების მიმართ გამამართლებელი განაჩენი გამოიტანა.